Parıjdegi Áýlıe Ana shirkeýine kúrdeli qaıta jańǵyrtý jumystary júrgizilip, 7 jeltoqsan kúni esigin qaıta ashady, dep habarlaıdy "Adyrna" ulttyq portaly.
Alaıda keıbir sarapshylar bul merzimniń tym qysqa bolǵanyn aıtyp alańdaýshylyq bildirýde.
15 sáýir 2019 jyly oryn alǵan órt kezinde Áýlıe Ana shirkeýiniń shatyry men kúmbezi qatty zaqymdandy. Myńdaǵan parıjdikter men týrıstter sobordyń jalynǵa oranǵanyn úreımen baqylaǵan bolatyn. Prezıdent Emmanýel Makron shirkeýdi bes jyl ishinde qaıta qalpyna keltirýge ýáde bergen edi.
Sobordy qalpyna keltirý úshin álemniń túkpir-túkpirinen 800 mıllıon eýro kóleminde qarjy jınaldy. Onyń 700 mıllıon eýrosy qurylysqa jumsalǵan. Jańǵyrtýǵa 250-ge jýyq kompanııa men sheberhana atsalysqan.
Germanııa Áýlıe Ana shirkeýin qalpyna keltirýge erekshe úles qosty. DW málimetinshe, Keln shirkeýdegi 1965 jyly franýz sýretshisi Jak Le Shevale jasaǵan tórt vıtrajdy qalpyna keltirdi. Sondaı-aq, bavarııalyq sheberler qońyraýlardyń tilin daıyndaýǵa atsalysqan.
Alaıda keıbir sarapshylar qaıta qalpyna keltirý jumystarynyń asyǵys jasalǵanyna alańdaýly. Arhıtektor Barbara Shok-Vernerdiń aıtýynsha, qurylys materıaldarynyń, ásirese aǵashtardyń tolyq kebýge úlgermeýi bolashaqta qıyndyq týǵyzýy múmkin.
7 jeltoqsan kúni Áýlıe Ana shirkeýiniń qaıta ashylý saltanatyna 3000-ǵa jýyq arnaıy qonaq qatysady. Onyń ishinde álemniń 50 eliniń basshylary bar. Franııa prezıdenti Emmanýel Makron saltanatty jıynda sóz sóıleıdi. Al 8 jeltoqsan kúni soborda alǵashqy messany Parıj arhıepıskopy ótkizedi.
Órtenip, qaıta qalypqa keltirilgen Áýlıe Ana shirkeýin kórý úshin onlaın tirkelý qajet, biraq kirý tegin bolady. Bul sheshim Katolık shirkeýiniń talaby boıynsha qabyldanǵany aıtyldy.
Shirkeýdiń ashylýy kezinde Parıjde qaýipsizdik kúsheıtilip, 6000-ǵa jýyq tártip saqshysy jumys isteıdi. Ashylý saltanatyna 40 myńǵa jýyq adam qatysady dep kútilýde.
