“Qazaqtelekom" AQ fılıaly – Servıstik fabrıkasynyń laýazymdy adamdary "ókilettiligin asyra paıdalandy" degen kúdikpen qamaýǵa alyndy. Bul týraly Antıkor málimdedi, dep habarlaıdy “Adyrna” ulttyq portaly.
Sybaılas jemqorlyqqa qarsy qyzmet "Qazaqtelekom" AQ fılıaly – servıstik fabrıkasynyń laýazymdy tulǵalaryna qatysty ókilettikterdi teris paıdalaný faktisi boıynsha qylmystyq isti tergep jatyr.
«Memleket basshysynyń tapsyrmasyn oryndaý úshin Sybaılas jemqorlyqqa qarsy is-qımyl agenttigi zańsyz satyp alynǵan aktıvterdi qaıtarý boıynsha turaqty negizde jumys júrgizýde. Qabyldanǵan sharalar men tetikter kesheni qoıylǵan mindetterdi tıimdi iske asyrýǵa jáne zańdylyqtyń buzylýyna ýaqytyly den qoıýǵa múmkindik beredi. Máselen, Sybaılas jemqorlyqqa qarsy qyzmettiń Jambyl oblysy boıynsha departamenti ulttyq kompanııanyń jyljymaıtyn múlik portfelin basqarýǵa jaýapty bólimshe bolyp tabylatyn "Qazaqtelekom" AQ fılıaly – servıstik fabrıkasynyń laýazymdy tulǵalaryna qatysty ókilettikterdi teris paıdalaný faktisi boıynsha qylmystyq isti tergeýde. Fılıaldyń bas dırektory men birqatar qyzmetkerleri memleket múddesine qaıshy jáne kásipker úshin paıda tabý maqsatynda oǵan Taraz qalasyndaǵy Qoǵamnyń ákimshilik ǵımaratyn kórineý tómen baǵamen satqan dep kúdiktenedi», – delingen Antıkor habarlamasynda.
Sondaı-aq, basshylyqtyń zańsyz áreketteriniń nátıjesinde memleketke 450 mıllıon teńgegeden astam somaǵa materıaldyq zalal keltirilgen.
Sottyń sankııasymen kúdiktiler qamaýǵa alyndy. Tergeý jalǵasyp jatyr.
