Astanada 28 qarashada Ujymdyq qaýipsizdik sharty uıymynyń (UQShU) sammıti ótti. Jabyq esik jaǵdaıynda ótken jıynda halyqaralyq jáne aımaqtaǵy qaýipsizdik máseleleri keńinen talqylandy, dep habarlaıdy "Adyrna" ulttyq portaly Azattyq radıosyna siltep.
Sammıtke Qazaqstan Prezıdenti Qasym-Jomart Toqaev, Reseı prezıdenti Vladımır Pýtın, Belarýs basshysy Aleksandr Lýkashenko, Qyrǵyzstan prezıdenti Sadyr Japarov, Tájikstan prezıdenti Emomalı Rahmon jáne UQShU Bas hatshysy Imanǵalı Tasmaǵambetov qatysty.
Sammıt qarsańynda Imanǵalı Tasmaǵambetov "Oreshnık" gıperdybystyq zymyranyn qoldaný máselesi men UQShU-nyń zamanaýı qarý-jaraqtardy zertteý jumystary týraly málimdeme jasady. Ol Reseıdiń jańa zymyran júıesin synaqtan ótkizýge májbúr bolǵanyn atap ótip, halyqaralyq jaǵdaıdyń uıym jumysyna tikeleı áser etetinin jetkizdi.
Sonymen qatar, uıym sammıtinde amerıkalyq ATACMS zymyrany men onyń Reseı aýmaǵyndaǵy nysanalarǵa shabýyly talqylanbaıtyny da belgili boldy. Bas hatshy Reseıdiń UQShU-dan áskerı kómek suramaǵanyn, mundaı ótinishtiń túspegenin rastady.
Prezıdent Qasym-Jomart Toqaev UQShU-ny jaı ǵana áskerı áriptestik emes, múshe elderdiń egemendigi men aýmaqtyq tutastyǵyn qorǵaýǵa baǵyttalǵan teńdessiz mehanızm dep atady. Ol Qazaqstannyń tóraǵalyǵy kezinde uıymnyń jumysy júıeli túrde damyǵanyn, áskerı jattyǵýlar men konsýltaııalardyń úzdiksiz uıymdastyrylǵanyn atap ótti.
Bul sammıt Armenııanyń qatysýynsyz ótti. Erevan uıymnan shyǵý múmkindigin birneshe ret kótergenimen, ázirge resmı túrde sheshim qabyldamaǵan.
Jıyn barysynda UQShU elderiniń qaýipsizdigin qamtamasyz etý, halyqaralyq jaǵdaıdyń damý bolashaǵy jáne uıym aıasyndaǵy jańa múmkindikter talqylandy. Qazaqstannyń 2024 jylǵy UQShU-daǵy tóraǵalyǵynyń qorytyndylary jarııalanyp, aldaǵy kezeńniń jospary bekitildi.
Sammıt sońynda taraptar birlesken málimdeme qabyldap, ózara qoldaý kórsetýge jáne uıymnyń aımaqtaǵy turaqtylyqty qamtamasyz etýge qosqan úlesin nyǵaıtýǵa kelisti.
