Qazaqstan Prezıdenti Qasym-Jomart Toqaev Ujymdyq qaýipsizdik sharty uıymynyń (UQShU) shaǵyn quramdaǵy sessııasyna qatysyp, uıymnyń qaýipsizdik pen turaqtylyqty qamtamasyz etýdegi rólin atap ótti, dep habarlaıdy "Adyrna" ulttyq portaly Aqordaǵa silteme jasap.
Sessııa otyrysyna Belarýs prezıdenti Aleksandr Lýkashenko, Qyrǵyzstan prezıdenti Sadyr Japarov, Reseı prezıdenti Vladımır Pýtın, Tájikstan prezıdenti Emomalı Rahmon jáne UQShU Bas hatshysy Imanǵalı Tasmaǵambetov qatysty.
Prezıdent Qasym-Jomart Toqaev UQShU-ny Eýrazııa keńistigindegi beıbitshilik pen turaqtylyqty saqtaýdyń negizgi qurylymdarynyń biri dep atap ótti.
"UQShU múshe elder úshin qaýipsizdik kepili ekenin dáleldep otyr. Uıym memleketterdiń egemendigi men aýmaqtyq tutastyǵyn qorǵaý maqsatynda kúsh-jigerimizdi biriktiretin biregeı mehanızm", – dedi Toqaev.
Qazaqstannyń UQShU-ǵa tóraǵalyǵy kezinde uıymnyń múmkindikterin jetildirýge, terrorızm, kıbershabýyl, transulttyq qylmys jáne esirtki aınalymyna qarsy is-qımyldar tıimdiligin arttyrýǵa erekshe nazar aýdarylǵany aıtyldy. Sonymen qatar, Uıymnyń áskerı oqý-jattyǵýlary, mınıstrlikter men keńester deńgeıinde konsýltaııalar josparly túrde júrgizildi.
Sessııada halyqaralyq jáne óńirlik qaýipsizdik máseleleri talqylanyp, UQShU-nyń aldaǵy josparlary naqtylandy. Qazaqstannyń tóraǵalyǵy kezinde qabyldanǵan basymdyqtardyń barlyǵy júzege asyrylyp, qoıylǵan mindetter oryndalǵany atap ótildi.
Prezıdent uıym múshelerine qoldaý men birlesken jumys úshin alǵysyn bildirip, Uly Jeńistiń 80 jyldyǵyna daıyndyqqa erekshe kóńil bólingenin jetkizdi.
Jıyn qorytyndysynda 2024 jylǵy tóraǵalyq josparlary aıqyndalyp, Ujymdyq qaýipsizdik keńesiniń málimdemesi usynyldy.
