Soltústik Qazaqstan oblysy Aqqaıyń aýdanyndaǵy Daıyndyq aýylynyń turǵyndary araq-sharaptan tolyǵymen bas tartty, dep habarlaıdy “Adyrna” ulttyq portaly.
Daıyndyq aýylyna 5 jyl buryn otbasymen kóship kelgen Zarına Aıýpova aýyl týraly oıyn aıtty.
«Bul aýylda araq múldem ishpeıdi, bos júrgen adam joq, barlyǵy jumys isteıdi, dúkende alkogol satpaıdy, barlyǵy óz sharýasymen aınalysady. Bizdiń aýyl tynysh», — deıdi aýyl turǵyny.
Bir kezderi quryp ketýdiń az-aq aldynda qalǵan aýyl qazir óńirdegi úlgili eldi mekenderdiń qataryna engen.
«Úzdik 30 aýyl» respýblıkalyq jobasynda úzdikter qatarynan kórindi. Jergilikti kásipker Birjan Shaımerdenov jumys oryndaryn quryp qana qoımaı, jumysshylaryna jańa baspana turǵyzyp jatyr.
«Biz munda jumys isteı bastaǵanda aýylda 28 úı ǵana boldy, qazir olardyń sany 80-nen asyp otyr. Halyq sany — 315 adam. Biz otbasylardy osynda kóshýge shaqyramyz, jumys ornyn usynamyz, óndiristi arttyramyz», — deıdi Birjan Shaımerdenov.
Búginde aýyl mektebinde 97 oqýshy bilim alady. Túlekter aýylǵa qajetti mamandyqty meńgerip, qaıtyp kelip jatyr.
