Reseı Qazaqstanmen birge birlesken tarıhshylar tobyn qurýdy kózdep otyr, dep habarlaıdy “Adyrna” ulttyq portaly QazTAG agenttigine siltep.
- Reseı men Qazaqstanda bizdiń ortaq tarıhı jolmen ótkenimizben jáne qazirgi tarıhymen baılanysty taqyryptar ara-tura týyndap otyrady. Osy rette, birlesken tarıhshylar tobyn qurý týraly oń kelisimge qol jetkizilgenin atap ótkim keledi, - dedi Reseıdiń syrtqy ister mınıstri Sergeı Lavrov Astanadaǵy Memlekettik basqarý akademııasynyń Dıplomatııa ınstıtýtynda.
Mınıstr mundaı qadamnyń eki elge de paıdaly ekenin jáne qoǵamnyń keı bóliginde paıda bolatyn pikirtalastardy báseńdetýge kómektesetinin atap ótti. Onyń sózinshe, bul bastama ózara kelisim negizinde júzege asyrylyp jatyr.
Sonymen qatar, mınıstr Lavrov Qazaqstan men Reseı arasynda sheshýdi talap etetin birqatar máseleler bar ekenin atap ótti.
- Eki memleket arasyndaǵy qarym-qatynasta máseleler bolmasa, onda qarym-qatynastyń ózi de joq degen sóz. Kez kelgen ekijaqty qarym-qatynasta kún tártibi qanshalyqty baı bolsa, sonshalyqty kóp naqty sheshimderdi qajet etetin máseleler týyndaıdy. Bizde Qazaqstanmen, bizge dos ári odaqtas memleketpen qarym-qatynastar dál osylaı damyp keledi, - dedi Lavrov.
