Ardager jýrnalıst Samat Ibraım ómirden ótti. Bul týraly jýrnalıst Baǵdagúl Balaýbaeva Facebook paraqshasynda aıtty, dep habarlaıdy “Adyrna” ulttyq portaly.
“Men úshin orny bólek azamat. Bolmysy bólek tulǵa. Qarapaıymdylyǵy men eńbekqorlyǵy ózgelerge úlgi basshy. Meniń jýrnalıstıkaǵa kelýime sebepshi redaktor... Endi mine, jaqsylyq sharapatyn tıgizgen Samat aǵa da, Nurperzent aǵa da kelmestiń kemesine minip, estelik jazyp otyrmyn. Qosh bolyńyz, jaqsy aǵa”, dep jazdy Baǵdagúl Balaýbaeva.
Qazaqstan Jazýshylar odaǵynyń jáne Qazaqstan Jýrnalıster odaǵynyń múshesi, Qazaqstan Jýrnalıstıkasy Akademııasynyń akademıgi Samat Ibraımmen qoshtasý rásimi 6 qarasha kúni Qazaqstan Jazýshylar odaǵynda ótedi.
Samat Bektenuly Ibraım 1955 jyly 18 maýsym, Atyraý oblysy, Isataı aýdany, Aıbas aýylynda týǵan. Jýrnalıst, zańger. QazMÝ-diń jýrnalıstıka fakýltetin (1982 j), D.A.Qonaev atyndaǵy Gýmanıtarlyq ýnıversıtetiniń zań fakýltetin (1999) bitirgen. Eńbek jolyn 1972 jyly «Jaıyqmunaıgaz» basqarmasynda operator bolýdan bastaǵan. 1974-1976 jyldary áskerde qyzmet etken. Atyraý oblystyq «Kommýnıstik eńbek» gazetinde tilshi (1982-86), respýblıkalyq «Lenınshil jas» gazetiniń Kaspıı aımaǵyndaǵy menshikti tilshisi (1986-90), Qazaqstan Respýblıkasy Parlamentiniń organy bolǵan «Halyq keńesi» gazetinde bólim meńgerýshisi, jaýapty hatshy, bas redaktordyń orynbasary bolyp istedi (1990-1996). Qazaqstan Respýblıkasy Bas prokýratýrasynyń bólim bastyǵy, «Zań jáne zaman» – «Zakon ı vremıa» jýrnalynyń bas redaktory boldy (1996-2003). «Zańnama» JShS-niń dırektory, respýblıkalyq «Aqıqat» jýrnalynyń bas redaktory (2003-2009) boldy. 2009 jyldyń naýryz aıynan «Ana tili» gazetiniń bas redaktory.
«Atyraý aqyn-jazýshylarynyń kitaphanasy» serııasy boıynsha «Ǵumyrlyq saǵynysh» áńgimeler jınaǵy (2003), «Munaıshy» qoǵamdyq qory shyǵaratyn «Qazaq munaıynyń ardaqtylary» serııasymen «Salamat Muqashev» (2006), «Asqar Qulybaev» (2007), «Jetpisbaı Esenjanov» (2008) atty derekti ǵumyrnamalyq esse kitaptary baspadan jaryq kórdi. Qazaqstan prokýratýrasy tarıhy týraly «Dáýir daýysy» kitabynyń (1997) qurastyrýshysy ári redaktory. Qazaqstan Respýblıkasy Mádenıet jáne aqparat mınıstrliginiń baǵdarlamasy boıynsha «N.Nazarbaev – etnosaralyq jáne dinaralyq qazaqstandyq kelisimniń negizin qalaýshy» atty kitapty (2005 j.), «Kaspıı qaırańy» tanymdyq basylymyn (2000 j.), «Mádenı mura» memlekettik baǵdarlamasynyń kitap serııalary boıynsha «Qazaqstannyń qazirgi zamanǵy mádenıettaný paradıgmalary» dep atalatyn 10-shy tomdy (2006), «Álemdik fılosofııalyq mura. HH ǵasyrdaǵy mádenıet fılosofııasy» 17-shi tomdy (2008) jáne t.b eńbekterdi, tarıh, zań, ekonomıka salasyndaǵy ádebıetter men oqý quraldaryn memlekettik tilge aýdardy.
