Ispanııalyqtar seısenbi kúni bolǵan Valensııa provınııasyndaǵy kúshti sý tasqynyna jaýaptylardy izdeı bastady. Baspasóz jáne áleýmettik jeli qoldanýshylary qutqarýshylardy tym kesh eskertý jasady, bılik mundaı apatqa daıyn bolmaı shyqty deıdi.
Sońǵy málimetter boıynsha, Ispanııanyń shyǵysyndaǵy qatty nóser men odan keıingi sý tasqyny saldarynan qaza tapqandar 158-den asty. VVS arnasy osy týraly maqalasynda apat tórkinin anyqtaýǵa tyrysqan.
Azamattyq qorǵanys qyzmeti seısenbi kúni keshke kóptegen eldi mekenderdi sý basqan kezde ǵana qaýip týraly eskertý jasaǵan.
«Bul tragedııanyń aýqymy halyqqa tym kesh habarlandy ma degen suraq týdyrady. Azamattyq qorǵanys qyzmeti qalalardy sý basqan kezde ǵana eskertý jiberdi» - dep jazady Ispanııanyń El Mundo gazeti.
Gazet júzdegen adamnyń seısenbiden sársenbige qaraǵan túnin óndiristik aımaqtarda nemese jol boıyndaǵy kólikterde ótkizgenin atap ótti. Óıtkeni keshke qaraı sý tasqyny saldarynan joldar jabylǵan.
«Mer retinde maǵan eshkim Magre ózeni arnasynan asyp ketýi múmkin dep eskertken joq. Ol qalany sýǵa toltyryp, kir men qoqyspen jaýyp tastady», - dep shaǵymdandy Alkýldııa qalasynyń meri Andreý Salom.
Ekinshi jaǵynan, Alıkante ýnıversıtetiniń klımatology Horhe Olsınanyń aıtýynsha, Ispanııanyń meteorologııalyq qyzmeti adamdarǵa óz ómirlerine qaýip tóndirmeý úshin úıde qalý kerektigin naqty eskertken.
«Biraq adamdar «qyzyl» eskertý alsa da, ómirlerin qalypty kúıde ótkizgisi keledi», - dedi Olsına Cadena Ser radıosynyń efırinde.
Keıbir azamattar Valensııa provınııasynyń bıligin qutqarý qyzmetine aqsha únemdedi dep aıyptaıdy.
Provınııanyń basshysy, konservator Karlos Mason UVE - tótenshe jaǵdaı qyzmetin joıý týraly sheshimin qaıtadan aqtaýǵa májbúr boldy.
UVE-ny sońǵy saılaýǵa deıin provınııada bılikte bolǵan solshyl saıasatkerler qurǵan. Ótken jylǵy saılaýda jeńiske jetken Karlos Mason bul jańa mekemeni birden jaýyp, paıdasynan shyǵyny kóp degen.
Endi bul sheshimdi Masonnyń jáne onyń konservatıvti Halyq partııasynyń qarsylastary qaıta synǵa alyp jatyr.
Valensııa provınııasynyń bıligi UVE shyn máninde oıdan shyǵarylǵan uıym ekenin aıtyp, «órt sóndirýshileri - nól, materıaldyq qamtamasyz etý - nól, tıimdilik - nól» dep jaýap berdi.
Kópshilik Karlos Masondy seısenbi kúni keshki altydan bastap jaýyn-shashyn azaıady dep ýáde bergeni úshin de aıyptaýda. Azaıýdyń ornyna keshki ýaqytta aǵyn sý qalalar men aýyldardy basyp, kólikterdi aǵyzyp, joldardy shaıyp ketti.
Mason buǵan jaýap retinde dúısenbiden bastap qutqarý qyzmetteri joǵary daıyndyq rejıminde bolǵanyn jáne apattyń tótenshe sıpatyna baılanysty adamdarǵa naqty nusqaý berý óte qıyn ekenin aıtty.
«Sarapshylardyń aıtýynsha mundaı jaǵdaı buryn-sońdy bolmaǵan», - degen provınııa basshysy.
Klımattyń ózgerýine qarsy belsendiler Ispanııadaǵy sý tasqynynyń jahandyq jylynýdy toqtatý úshin jyldam ári batyl áreket etý qajettigin eske salatynyn aıtýda.
«Klımattyń ózgerýi abstraktili uǵym emes, bul – bizdiń ómirimizge áser etetin shyndyq. Bul jaǵdaı ómirge qaýip tóndiredi», - dedi Greenpeace uıymynyń Ispanııadaǵy fılıalynyń basshysy Eva Saldanıa.
Alıkante ýnıversıtetiniń ǵalymy jáne Ispanııadaǵy klımattyń ózgerýine qatysty jaqynda shyqqan baıandamanyń teń avtory Horhe Olsına Valensııadaǵy kúshti jańbyr men sý tasqynynyń dál osy sııaqty kórinisterdiń biri ekenin atap ótti.
Klımatologtardyń pikirinshe, qazirgi sý tasqynynyna kóptegen faktorlardyń jıyntyǵy sebep bolyp otyr. Alaıda jahandyq jylyný nátıjesinde atmosferanyń birtindep jylynýy mundaı tabıǵı apattardyń bolý yqtımaldyǵyn arttyrady.
