Bizdiń búgingi keıipkerimiz – Nurdáýlet Qudabaı, Qazaqstan Ulttyq gvardııasynyń «Ortalyq» óńirlik qolbasshylyǵyna qarasty 3517 áskerı bóliminiń Stepnogorsk qalasyndaǵy sarbazy. Qatardaǵy jaýynger Qudabaı óz qyzmettesterimen salystyrǵanda boıshańdyǵymen erekshelenedi – onyń boıy 2 metr 4 santımetr. Shymkent qalasynan shaqyrylǵan sarbaz bıiktigin ata-anasynan muraǵa alǵan, olardyń boıy da 1 metr 80 santımetrden asady. Nurdáýlet – otbasyndaǵy tórt balanyń kenjesi. Onyń úlken aǵasy da uzyn boıly, al ekinshi aǵasy men ápkesi odan sál tómen bolǵanymen, olar da kópshilik arasynda kózge birden túsedi. Bul genetıkalyq erekshelik ákesiniń ata-ájesinen berilgen.
"Ákemniń ata-anasy da uzyn boıly. Sondyqtan bul – bizdiń otbasylyq ereksheligimiz", – dep maqtanyshpen aıtady Nurdáýlet.
Qatardaǵy Qudabaı qyzmetin ózgeler sııaqty eshbir artyqshylyqsyz ótep júr. Onyń tósegi 2 metr 5 santımetr uzyndyqta, gvardııashy oǵan tolyǵymen syıyp jatady.
"Basynda úırenshikti emes edi, barlyǵy meni kórip tańdanyp, boıymnyń qansha ekenin suraıtyn", – deıdi Nurdáýlet.
Boıdyń bıik bolýynyń artyqshylyqtary men kemshilikteri de bar eken. Mysaly, Nurdáýlet jaqsy sportshy, voleıboldy sheber oınaıdy. Al azamattyq ómirde kıim tańdaýda qıyndyqtarǵa jıi tap bolady eken. Alaıda, áskerı bólim qoımasynan 56 ólshemdegi forma men 48 ólshemdegi báteńke tabylǵan. Al tómen esikterden ótkende basyn shalqaıtyp júrýine týra keledi.
Áskerge kelgenge deıin ol Shymkenttegi Ortalyq Azııa ınnovaııalyq ýnıversıtetinde oqyǵan, biraq óz qalaýymen azamattyq paryzyn oryndaý úshin oqýyn ýaqytsha toqtatypty. Qatarlastary onyń boıynyń bıik bolý qupııasyn jıi suraıdy eken, al Nurdáýlet kúlip: «Bul jerde gender kez kelgen jattyǵýdan kúshti!» – dep jaýap beredi.
Qatarlastary ony «bólimniń maıagy» dep ázildeıdi, óıtkeni ony alystan-aq kórýge bolady. Biraq ol renjimeıdi jáne boıynyń bıiktigin tek syrtqy erekshelik qana emes, Otan aldyndaǵy joǵary jaýapkershiliktiń sımvoly dep sanaıdy.
Qyzmet merzimi aıaqtalǵan soń, Nurdáýlet oqýyna oralyp, bilimin jalǵastyrýdy armandaıdy. Degenmen, ol bul áskerdegi jylyn ómir boıy este saqtaıtynyn aıtady. Ásker – naǵyz ómir mektebi!
