Talǵarda kisi qolynan qaza bolǵan 16 jastaǵy jasóspirim Sherzat Bolattyń ákesi eshqandaı kóteriliske shyqpaýǵa shaqyrdy, dep habarlaıdy “Adyrna” ulttyq portaly.
Sherzattyń ákesi Qarjaýbaı Nurymov pen marqum Saltanat Núkenovanyń baýyry Aıtbek Amangeldi vıdeoúndeý arqyly mıtıngke shyqpaýdy surady.
"Qazaq eli, taǵy aıta ketetinim, 14 qazanda eshqandaı mıtıng, qantógis bolmaıdy. Ádiletti sot úkimin kútemin. Tergeý júrgiziledi. Elder kelip jatyr. Astanadan da kelip jatyr. Advokattar da bar. Marqum Saltanattyń baýyry da bar. Osy jigitter kómektesip jatyr. Halyqqa aıtarym, qoldaý kórsetip jatyrsyzdar, Alla razy bolsyn! Kóp raqmet! Qazir qantógis, mıtıng, shoǵyrlaný balamnyń isiniń júrýine toqtaý bolady. Sol sebepti ótinip suraıtynym, aqyldy, salany el bolýymyz kerek. Búgingi kúndi ǵana emes erteńgi kúndi de oılaýymyz kerek qoı. Qantógispen eshteńe sheshilmeıdi... Meniń qalaýym – balam úshin ádil sot. Ashyq, ádil sot bolǵansha, sońyna deıin baramyn. Meniń maqsatym sońyna deıin baramyn dep, bireýdi atyp, bireýmen tóbelesý emes, jaman adamdar jaman pıǵylyn jasaı bersin. Odan keıin aıtatanym, kóńilderińizge raqmet, biraq aqsha jınaýdyń keregi joq. Búgin balamnyń jetisi edi. Qaraly kúnde aqsha jasaıyn dep júrgen azamat emespin", - dep málimdedi ol.
Aıtbek Amangeldi de búgin órt bolǵan jerge barǵanyn habarlady. Ol qoǵam belsendileri Ishki ister mınıstrligimen jáne Bas prokýratýra ókilderimen sóıleskenin atap ótti. Sondaı-aq ol da 14 qazanda mıtıng bolady degen aqparatty joqqa shyǵaryp, halyqty jalǵan aqparattyń jeteginde ketpeýge shaqyrdy.
