Eski kólikterge salynatyn salyqty azaıtý máselesi qarastyrylýda. Úkimet qyrkúıek aıynyń ortasynda jańa Salyq kodeksiniń jobasyn Májilistiń qaraýyna berdi, dep habarlaıdy “Adyrna” ulttyq portaly inbusiness.kz saıtyna siltep.
Aqparatqa sáıkes, jańa Salyq kodeksinde eski kólikterge qatysty birqatar jańashyldyq bar. Atap aıtqanda, qoldanýy 10 jyldan asqan avtomobılderge salynatyn salyq mólsheri 30%-ǵa, al 20 jyldan asqan kólikter úshin 50 paıyzǵa tómendetilmek. Atqarýshy bılik usynyp otyrǵan bul ózgerister depýtattar arasynda qyzý talqyǵa tústi.
"Eski kólik bolsa, oǵan salyqty azaıtamyz deıdi. Ýtıl alym máselesi bolǵanda bizge jeńil kólikter jańa bolǵany jaqsy dep aıtty. Bul argýment túsinikti. Endi mashına eski bolatyn bolsa, salyqty azaıtamyz deıdi. Onyń bir-birimen logıkasy qandaı?", - dedi Májilis depýtaty Ashat Aımaǵambetov.
Qarjy vıe-mınıstri Erjan Birjanov aýyldarda júzdegen myń eski kólik baryn jetkizdi. Aıtýynsha, eldimekenderde "Jıgýlı" men "Moskvıchter" áli kúnge deıin júr.
"Biz eski kólikter boıynsha tómendetilgen salyq salamyz. Kóbi synyp tur, biraq tirkeýden alynǵan joq. Istemeıtin kólikke jyl saıyn (salyqqa) on myńnan kelip tursa, aýyrtpashylyq tıedi. Bul aýyl turǵyndarynyń ótinishi boldy. Óńirlerde júrgen kezde osyndaı usynystar túsken", - dedi vıe-mınıstr.
Avtosarapshy Alekseı Alekseev tıisti jańashyldyqqa qatysty pikirin bildirdi.
"Onyń ornyna qozǵaltqyshy úlken eski kólikter úshin salyqty ońtaılandyrýdy usynar edim. Máselen, bizde qozǵaltqysh kólemi 4 lıtrden asatyn eski kólikter jeterlik, olardyń salyǵy óte joǵary. Zańda osyndaı qısynsyz dúnıe bar. Qoldanýy 20, 30 jyldan asqan úlken qozǵaltqyshy bar kólikterde qalypty salyq bolýy kerek. Sebebi maqsat úlken qozǵaltqyshtarǵa salyq salý boldy, zań qabyldanǵan kezde úlken qozǵaltqyshy bar kólikterdiń deni premıým sanattaǵy, ıaǵnı qymbat kólikter bolatyn. Olarǵa joǵary salyq salý aqylǵa qonymdy edi. Biraq eski mashınalar da osy máselege tap boldy", - dedi sarapshy.
Sózinshe, eski kólikterge salynatyn salyqty azaıtýǵa qatysty ózgeristerge halyq alǵysyn aıtýy múmkin.
"Menińshe, tek qazynaǵa az túsetini bolmasa, ol eshnársege áser etpeıdi. Eger de kóliktegi qozǵaltqysh kólemi 2 lıtrge jýyq bolsa, onda salyqtyń tómendeýiniń qatty áseri bolmaıdy. Osyǵan deıin jylyna 10 myń tólep kelgen adam endi 5 myń tóleıtin bolady degendeı. Qozǵaltqysh kólemi úlken eski mashınalarǵa salyqty azaıtý kerek, sonda qısyndy bolar edi", - dedi Alekseı Alekseev.
Atap keteıik, eski kólikter úshin kólik salyǵyn azaıtý týraly usynystar jańa Salyq kodeksinde aıqyndalǵan.
