Memleket basshysy ustazdardy merekemen quttyqtady, dep habarlaıdy "Adyrna" ulttyq portaly Aqordaǵa siltep.
Prezıdent Qasym-Jomart Toqaev ustazdar qaýymyn kásibı merekesimen quttyqtap, asa jaýapty ári qasterli mindetti abyroımen atqaryp júrgen pedagogterge alǵys aıtty.
"Meniń tapsyrmammen "Pedagog mártebesi týraly" arnaıy zań qabyldandy. Bul qujat ustazdardyń zańdy múddesi men quqyqtaryn qorǵaýǵa yqpal etti. Qazir muǵalimder men tárbıeshilerdiń jalaqysy aıtarlyqtaı kóbeıdi. Olar negizgi qyzmetine kedergi keltiretin artyq mindetterden bosatyldy. Osy zańǵa sáıkes "Qazaqstannyń eńbek sińirgen ustazy" ataǵy engizildi. Bul – jaı ataq emes, mártebeli memlekettik nagrada. Onyń ıegerine qomaqty syıaqy beriledi. Respýblıka boıynsha 46 muǵalim osy nagradaǵa ıe boldy. Sondaı-aq, qazir ustazdarǵa akademııalyq dárejesine sáıkes ústemeaqy tólenip jatyr. Halyqaralyq olımpıada júldegerlerin daıyndaǵan muǵalimderge qarjylaı qoldaý kórsetiledi. Pedagog mamandyǵy boıynsha oqyp jatqan stýdentterdiń shákirtaqysy 2,5 ese kóbeıdi. Bıyl bolashaq ustazdardy daıarlaý úshin 16 myńǵa jýyq grant bólindi. Sonyń ishinde shamamen 1800 "Altyn belgi" ıegeri pedagogıka mamandyǵyn tańdady. Bul – óte jaqsy úrdis", – dedi Memleket basshysy.
Memleket basshysy balany oqytýda tek muǵalim emes, ata-ana da jaýapty ekenin aıtty.
"Muǵalimniń mártebesi qashanda bárinen bıik. Uly tulǵalardyń ózi ustazynyń aldynda shákirt bolyp qala beredi. Bir sózben aıtsaq, barsha jetistiktiń bastaýynda ustaz tur. Ulttyń bolashaǵy – ustazdyń qolynda. Meniń maqsatym – ustazdy qoǵamymyzdyń basty keıipkeri retinde dáripteý. Sebebi sizder bala oqytý arqyly keleshektiń kirpishin qalaısyzdar. Qazaqstannyń damyǵan el bolýyna zor úles qosyp júrsizder. Sizderdiń tabandy eńbekterińiz erekshe qurmet pen joǵary marapatqa laıyq", – dedi Prezıdent.
Jıyn sońynda Memleket basshysy bilim berý isindegi asa úzdik jetistikteri jáne Qazaqstan Respýblıkasyna sińirgen aıryqsha eńbegi úshin bir top pedagogke "Qazaqstannyń eńbek sińirgen ustazy" ataǵyn tapsyrdy.
