Almaty oblysynda 16 jastaǵy balanyń ólimi tergelip jatyr, dep habarlaıdy "Adyrna" ulttyq portaly.
Jasóspirim jappaı tóbeles kezinde kóz jumdy. KTK arnasynyń málimetinshe, janjal jigittiń otbasy jalǵa alǵan dúkende bastalǵan.
Qaıǵyly oqıǵa Talǵarda bolǵan. Jalǵa alynǵan dúkenniń aýysymynda úıdiń otaǵasy jumys istegen. Týystarynyń aıtýynsha, klıent er adam saýda núktesine bir quty syra satyp alýǵa kelgen. Alaıda ol syra úshin aqsha tólegisi kelmeı, urys-keris bastalǵan. 16 jastaǵy marqum Sherzat pen onyń aǵasy ákesin jaqtap, klıentten ketýin ótingen. Biraq onyń ornyna janjal shyǵarǵan azamat dostaryna qońyraý shalyp, oqıǵa ornyna taǵy adamdar kelgen.
“Ulym maǵan qońyraý shalyp, qazir ákesi men aǵasyn uryp-soǵatynyn aıtty. Birden dúkenge júgirdim. Biraq men jetkenshe ulym men kúıeýimniń aǵasyn uryp-soǵyp úlgeripti. Kúıeýi pyshaq ustaǵan adamdy olardan alyp ketken. Ony qarýlanǵan dep qoryqqan. Biraq ol jerdegilerdiń barlyǵynda pyshaq, tipti myltyq boldy. Ulymdy kóz alymda kókala qoıdaı etip sabaǵan. Onyń qansyrap jatqanyn kórdim”, – deıdi jigittiń anasy Gúlbara Bıshembıeva.
Qaıtys bolǵan jasóspirimniń anasy kúdiktilerdiń pyshaq ala júgirgenin aıtady. Marqumnyń týys aǵasy da pyshaq jaraqatynan zardap shekken.
“Sherzattyń ákesi tek klıenttiń taýar úshin aqsha tóleýin qalaǵan. Bul durys qoı. Kelgen adam ne sebepti olarǵa tıisip, tóbelesip, bireýlerge qońyraý shala bastady? 15-20-dan kem emes adam keldi. Olardyń arasynda úsh-tórt qyz boldy. Barlyǵy jas, biraq ózderin ańdar sııaqty ustady. Tipti myltyqtary men pyshaqtary bolǵan”, – deıdi kóz jumǵan jigittiń taǵy bir týysy Kúlásh Rımova.
Tóbeles saldarynan aýrýhanada kóz jumǵan oqýshynyń denesi úıine jetkizilgen.
