Qazaqstannyń Tótenshe jaǵdaılar mınıstrligine tikushaqtardy Reseıden satyp alýǵa bolady, bul múmkindikti QR Tótenshe jaǵdaılar mınıstri Shyńǵys Árinov joqqa shyǵarmaıdy, dep habarlaıdy “Adyrna” ulttyq portaly QazTAG-qa silteme jasap.
«Qazir biz úsh MI-8 AMT jáne tórt K-32 satyp alýdy qarastyryp jatyrmyz. Eger biz tikushaq tehnıkasy týraly aıtatyn bolsaq, ıá, ol lızıngke satyp alynady, buǵan halyqaralyq kompanııalar qatysady. Jaqyn arada biz osy másele, ıaǵnı baǵa belgileý jáne oǵan qatysty barlyq máseleler boıynsha sheshim qabyldaımyz dep oılaımyn. Qazir 405-shi zaýytta (Almatydaǵy avıajóndeý zaýyty ) qarbalas, jetkizý merzimi de óte uzaq. Sondyqtan bul qandaı da bir halyqaralyq jetkizýshi bolýy ábden múmkin», - dedi Arınov seısenbi kúni úkimettiń brıfınginde.
QazTAG jýrnalıstiniń bul reseılik jetkizýshi bolýy múmkin be degen suraǵyna Tótenshe jaǵdaılar mınıstrliginiń basshysy: «Múmkin, ıá» dep jaýap berdi.
Mınıstrdiń aıtýynsha, ázirge tek jeti tikushaq satyp alý josparlanýda, qalǵan tórteýi jaqyn arada alynady. Bul jaǵdaıda bastapqyda jarııalanǵan soma ózgeristerge ushyraýy múmkin.
«Bul kezeńde tipti osy jeti tikushaq jetkilikti bolady. Biraq jaǵdaı ózgerýde. Jaz boıy bizde órt qaýipti kezeńge baılanysty úlken transfertter boldy, biz tapshylyqty bastan keshirip jatqanymyzdy anyq kórdik. Jalpy, sol jerde áreket etý úshin ondaǵy 20 óńirdi áýe jasaqtary qamtýy kerek jáne jedel, utqyr, jyldam sheshim qabyldaý qajet», - dedi Árinov.
Aıta ketsek, Qazaqstannyń Tótenshe jaǵdaılar mınıstrligi qutqarý jumystaryn júrgizý úshin 11 jańa tikushaq alady. Olar qural-jabdyqtardy satyp alýǵa bıýdjetten 25 mıllıardqa jýyq teńge bólmekshi.
