Kaztalov aýdanynda «Qaladan-aýylǵa» baǵdarlamasy qarqyndy júrgizilýde. Óńirlik baǵdarlama aıasynda Bolashaq aýyldyq okrýginiń Jańatań jáne Kópkútir eldi mekenderinen 4 otbasy jańa baspanaǵa ıe boldy. Baspanaly bolǵan otbasylardy oblys ákimi Narıman Tóreǵalıev quttyqtap, turǵyn úı kiltin saltanatty túrde tabystady.
— Óńirimizde Memleket basshysynyń tapsyrmasymen birqatar ınfraqurylymdyq jobalar, memlekettik baǵdarlamalar júzege asýda. Onyń syrtynda óńirlik baǵdarlamalarymyzdy da iske qosyp jatyrmyz. Sonyń ishinde «Qaladan aýylǵa» baǵdarlamasy jas otbasylar úshin, halyqtyń ál-aýqatyn arttyrý jáne aýyldar men eldi mekenderdi damytýǵa sep bolady. Baǵdarlama aıasynda Kaztalov aýdanyna kóship kelgen jas otbasylardy quttyqtaımyn! Shańyraqtaryńyz berekeli bolyp, qýanysh pen shattyqqa tolsyn!, — dedi oblys ákimi.
Aýdanda joba iske asyrylatyn aýyldarda 16 turǵyn úı satyp alynýda. Búgingi kúni, aýyldarǵa quramynda 78 adam bar (sonyń ishinde 50 bala) 14 otbasy kóship kelip, ýaqytsha úılerge ornalastyryldy. Barlyq otbasylar turaqty jumyspen qamtylyp, mektep jasyndaǵy 24 bala mektepke, 25 bala mektepke deıingi uıymdarǵa ornalasty.
Jańatań eldi mekenindegi saltanatty is-sharada Sısenovtar men Súndetovter otbasy (Jańatań eldi mekeni), Jakýpovtar men Abdrahmanovtar (Kópkútir eldi mekeni) otbasy jańa baspanaǵa ıe boldy. Baǵdarlamanyń ıgiligin kórip otyrǵan Sısenovtar januıasynyń otanasy Shynaraı Tóremuratova qýanyshymen bólisip, oblys basshylyǵyna rızashylyǵyn bildirdi.
— Oblys ákimi Narıman Tóreǵalıulynyń bastamasymen júzege asyp jatyrǵan jobanyń naqty jemisin búgingi kilt alyp jatyrǵan jas otbasylarmen birge bizdiń otbasy da kórýde. Sol úshin oblys basshylyǵyna barsha «Qaladan-aýylǵa» baǵdarlamasyna qatysýshy otbasylardyń atynan shynaıy rızashylyǵymyzdy bildiremiz. Biz osy baǵdarlama arqyly Kaztalov aýdanynyń Jańatań aýylyna aqpan aıynyń basynda kóship kelgen bolatynbyz. Qaladan kóship kelý barysynda jergilikti atqarýshy organdar barlyq múmkindikti qarastyryp, ýaqytsha turǵyn úımen jáne sıyr, qoı men eshki maldarymen qamtamasyz etti. Qazir sol tórt túliktiń ıgiligin kórip otyrmyz. Joldasym Aıat ekeýimizdi turaqty jumysqa da ornalastyrdy. Joldasym merdigermen birge osy úıdiń salynýyna atsalysty, bizdiń otbasymyz úshin bul úı óte ystyq. Ózeginen teppeı, qushaq jaıa qarsy alǵan aýyl halqyna da alǵysymyz sheksiz!, — dedi ol.
Saltanatty is-sharada jas otbasylarǵa turǵyn úı kiltimenı qatar, eki bas iri qara jáne 10 bas ııqoı men eshkiniń sertıfıkaty tabystaldy. Al aýyldyń batagóı aqsaqaly Mýsın Esmaǵul jas otbasylarǵa aq batasyn berdi.
Aıta keteıik, qos eldi mekende turǵyn úı qurylystaryn jerlesterimiz, jeke ınvestorlar Meıirbek Fatıhov jáne Amanjol Kereev júrgizdi.
