Fýtboldan Ulttar lıgasyndaǵy Qazaqstan men Norvegııa arasyndaǵy kezdesýi teń aıaqtaldy. Qos quramanyń jankúıerleri tartysty oıynnyń kýási boldy.
Almatydaǵy Ortalyq stadıonda ótken oıynnyń bıletteri bir kúnde satylyp ketkeni habarlanǵan edi. Alaıda bul oıynda da 2 myń men 10 myń teńge arasynda turatyn bıletterdi «pysyqaılar» alyp, match kúni baǵasyn aspandatqan edi. Degenmen, 19:00-de bastalǵan matchty qyzyqtaýǵa kelgen bıleti bar jankúıer 20:00-ge deıin qaqpa aldynda turǵan. Bul týraly «Adyrna» tilshisi habarlady.
«Oıyn nátıjesi Norvegııanyń jeńisimen aıaqtalady» dep boljaǵan sport sarapshylarynyń oıy oryndalmady. Alańǵa jınalǵan kórermen de Norvegııa quramasynda oınap jatqan "Manchester Sıtıdiń" top shabýylshysy Erlıng Hollandtyń kóp gol soqqan oıynshy atanady dep sengen edi. Biraq Qazaqstan quramasynyń sportshylary qarsylastyń dobyn qaqpaǵa kirgizbedi.
OIYN QALAI ÓRBIDI?
Oıynnyń alǵashqy bóliginde shetten kelgen qonaqtar gol salýǵa birneshe ret oqtaldy. Norvegııalyq Felıks Mıýret qaqpa mańdaıshasynan qaıtty. Keıinnen kórermen kózaıymyna aınalǵan Erlıng Hollandtyń baǵyttaǵan doby shtangaǵa tıip, ekinshi matchta da esep ashylmady.
Qazaqstan quramasy atynan alǵashqy mınýttan bastap sheteldik klýbtarda oınap júrgen sportshylarymyz: Nuraly Álip, Baktıer Zaınýtdınov, Ramazan Orazov, Abat Aıymbetov syndy alańǵa shyqty. Qurama úzdikteri bolǵan Baýyrjan Islamhan, Aıbol Ábiken, Abzal Beısebekov jáne jaraqatyna baılanysty Maksım Samorodov qosalqy quramda qaldy.
Ulttyq quramanyń bas bapkeri Stanıslav Cherchesovoıyn barysynda sportshylardy almastyrǵanymen qarsylasqa eshkim gol salmady. Oıyn nátıjesi teń boldy.
BAS BAPKER NE DEIDI?
Oıyn aıaqtalǵan soń Ulttyq quramanyń bas bapkeri Cherchesov BAQ ókilderine pikirin bildirdi.
- Biz jańa joldy – Ulttar Lıgasy oıynyn bastadyq. Bul basqa deńgeı, bizge ár oıyn mańyzdy. Bizdiń mindetimiz - ár oıynǵa daıyndalý, qarsylastarymyzǵa qarsy shyǵý jáne olardyń kemshilikterin izdeý. Jigitterdi bastamasymen quttyqtap, bes degen baǵa bere alamyz. Shabýyldaýshylyqpen áli de jumys isteýimiz kerek, - dedi Cherchesov.
Al komanda kapıtany Ashat Taǵybergen qarsylastardyń soqqysyn toqtatý qıyn bolǵanyn aıtty.
- Bizde juldyz joq, biz ujymbyz. Árıne, teń nátıje – jaqsy nátıje, biraq biz óz alańymyzda odan da jaqsy nátıje kórsete alamyz. Odegaard pen basqa oıynshylarǵa qarsy turý qıyn boldy, biraq bir oıynshy bárin sheshpeıdi deıdi. Iá, deńgeı joǵary, biraq biz birlesken kúsh-jigerdiń arqasynda qarsylasty toqtattyq. Búgingi qoldaý joǵary deńgeıde boldy, jankúıerlerge rahmet, – deıdi Taǵybergen.
Qazaqstan quramasynyń jartylaı qorǵaýshysy Baqtııar Zaınýtdınov Norvegııamen ótken Ulttar lıgasynyń oıynynan (0:0) keıin óziniń Instagram paraqshasynda jankúıerlerine arnap, úndeý jasady.
«Jankúıerlerimizdiń keremet qoldaýyna raqmet!» - dep jazdy Zaınýtdınov.
JELIDEGI PIKIRLER
Tanymal bloger Erqanat Bókeı oıyn nátıjesinen soń Ulttyq quramaǵa alǵys aıtyp, jelidegi paraqshasyna vıdeo jarııalaǵan. Oqyrmandar túrli pikir jazyp, oıyndy qyzý talqylap jatyr. Damır esimdi jeli qoldanýshysy:
«Al, jaraısyńdar baýyrlarym, aıaqtaryń aýyrmasyn», - dep jazǵan.
«Anglııamen oınaǵan sııaqty, teń esepke qýanatyn sorlymyz ba?» - dep Malıka esimdi azamat pikir qaldyrǵan.
Belgisiz esimdi oqyrman: «Tek Zaınýtdınov, Vorogovskıı, Nuráli men oıyn sońyna qaraı Somorodov qana oınady», - dep jazǵan.
«Jaradyńdar balalar, óte jaqsy oıyn boldy», «Altyn sportshylar», «Jaraısyńdar, úzdiksińder» dep pikir qaldyrǵan oqyrmannyń sany kóp.
Endi 9 qyrkúıekte Qazaqstan quramasy Lıýblıanada Slovenııa quramasymen kezdesetin bolady.
Symbat Naýhan
«Adyrna» ulttyq portaly
