Eks-mınıstr Arystanbek Muhamedıuly kezinde arzanǵa satyp alǵan nysandaryn memleket menshigine qaıtaryp jatyr. Bul týraly Qazaqstan Respýblıkasynyń Bas prokýratýrasy málimdedi, dep habarlaı “Adyrna” ulttyq portaly.
Málimetke súıensek, prokýrorlar 4,8 mlrd teńgeden astam somaǵa múlikti memleket menshigine qaıtarý týraly talapqa bastamashy bolǵan. Sot ázirge bir talapty ǵana qanaǵattandyrǵan.
«Máselen, 2019 jyly burynǵy mádenıet mınıstri Muhamedıulymen úlestes jeke kompanııa 332 mln teńgege Sý jáne qoldanbaly sport túrleri boıynsha respýblıkalyq joǵary sport sheberligi mektebin satyp alǵan. Almaty qalasynda ornalasqan kásiporyn satylǵanǵa deıin 662 mln teńgege baǵalanǵan. Biraq, bundaı nysannyń naryqtaǵy quny 1,213 mlrd teńge», - dep habarlaıdy Bas prokýratýra.
Almaty qalasynyń prokýratýrasy kásiporyndy satyp alý-satý shartyn jaramsyz dep taný týraly talap qoıǵan.
«Sonymen qatar, Astana jáne Almaty qalalarynda burynǵy Mádenıet mınıstri Muhamedıulymen baılanysty kompanııalarǵa 3,5 mlrd teńgeden astam somaǵa satylǵan taǵy úsh obektini memleket menshigine qaıtarý týraly talap sotta talqylanyp jatyr. Bul is boıynsha Ulytaý oblysynyń prokýratýrasy Qaraǵandy memlekettik múlik departamenti basshylarynyń birin sotqa bergen», - dep jazady prokýratýra.
Aıta keteıik, Arystanbek Muhamdıuly ókilettiligin teris paıdalanǵany úshin jáne asa iri mólsherje qarajat urlap, reıderlik jasaǵany úshin 11 jylǵa sottalǵan edi.
