Almaty oblysy, Eńbekshiqazaq aýdany, Shelek aýylynyń muǵalimderi kótergen máselege qatysty tyń aqparat tarady, dep habarlaıdy "Adyrna" ulttyq portaly.
Jumyssyz qalý qaýpin aıtyp, jan-aıqaılaryn jetkizgen Shelek aýylyndaǵy Álııa Moldaǵulova atyndaǵy orta mekteptiń bir top ujymynyń arasynan eki-úsheýiniń, másele kóterip, úndeý joldaǵany úshin keshirim suraǵan beıneleri tarady. Kadrlarda bir muǵalim men eki oqý isiniń orynbasary ashýǵa berilip, jalǵan aqparatqa erip, asyǵys úndeý joldaǵandaryn aıtady. Alaıda kópshilik vıdeodaǵy ustazdardyń sózine senbeı, muǵalimderdi májbúrli túrde keshirim suratqyzǵan degen pikir jaýdyrýda.
Eńbekshiqazaq aýdany bilim bólimi basqarmasy jelige júktelgen vıdeonyń astyna muǵalimderge túsindirme jumystary júrgizildi, jumyssyzdyq qaýpi seıildi dep jaýap qaldyrǵan bolatyn. Degenmen, saǵat sanynyń kelisimdi túrde áli de rettelmegeni, shara qoldanylmaǵany aıtylýda.
"Shelek aýylyndaǵy Álııa Moldaǵulova atyndaǵy orta mektep muǵalimderiniń ótinishimen Almaty oblysy Eńbekshiqazaq aýdandyq bilim bóliminiń basshysymen kezdesý ótti. Kezdesý barysynda ustazdar qaýymy aǵymdaǵy jaǵdaı jáne beıneúndeýde aıtylǵan máseleler boıynsha túsinikteme aldy.
Bilim bóliminiń basshysy, búgingi kúnge deıin Á.Moldaǵulova atyndaǵy orta mektepten 279 oqýshy men 12 muǵalimniń jańa mektepke aýysqanyn jáne muǵalimderdiń jumys ýaqytynyń qysqarý qaýpi joq ekenin atap ótti. Búgingi tańda Á.Moldaǵulova atyndaǵy orta mektepte 543 oqýshy bilim alýda. Aldaǵy ýaqytta da, atalǵan mekteptiń oqýshylary jańa mektepke aýysqan jaǵdaıda, muǵalimder jumyspen qamtylatyn bolady.
Qazirgi ýaqytta mekteptegi oqý úrdisi bekitilgen kestege sáıkes júrgizilýde" delingen resmı málimdemede.
Eske sala keteıik, keshe 4 qyrkúıek kúni Shelek aýylynda jańadan salynǵan Ábdýálı Qaıdar atyndaǵy orta mekteptiń ashylýyna baılanysty Álııa Moldaǵulova atyndaǵy orta mektep ustazdary saǵat sanynyń azaıýyn aıtyp, jarty ujymnyń jumyssyz qalý máselesin kóterip, memleket basshysyna úndeý joldaǵan bolatyn. Alaıda, artynsha jelige júktelgen vıdeonyń oblystyq bilim basqarmasynyń qysymymen óshirilgeni aıtyldy.
