Astana qalasynda biylǧy mektep bıtıruşı tülekter arasynda jaŋa äleumettık ürdıs qalyptasyp keledı. Qalalyq bılım beru basqarmasynyŋ mälımetınşe, tülekterdıŋ şamamen 70% paiyzy dästürlı meiramhanalarda ötetın saltanatty keşterden bas tartyp, mektep qabyrǧasynda qarapaiym ärı mazmūndy türde qoştasudy jön körgen.
Būl bastamanyŋ basty maqsaty – mektep bıtıru keşınıŋ mänın sän-saltanatpen nemese qymbat dastarhanmen emes, ruhani qūndylyqtarmen ūştastyru. Tülekter üşın eŋ maŋyzdysy – ūstazdarǧa alǧys bıldıru, synyptastarymen estelık sätterdı bölısu jäne mekteppen taǧylymdy türde qoştasu.
Mektep äkımşılıkterınıŋ aituynşa, mūndai şeşım ata-analarǧa tüsetın artyq qarjylyq jüktemenı azaityp qana qoimai, äleumettık teŋsızdık pen daŋǧazalyqtyŋ aldyn aluǧa mümkındık beredı. Sonymen qatar jastar arasynda qarapaiymdylyq, jauapkerşılık jäne tärbielık qūndylyqtardy därıpteuge oŋ yqpal etude. Sondai-aq mektep bıtıru keşterın qauıpsız ärı tärtıptı ortada ötkızuge jol aşyp otyr.
Jaŋa ürdıstıŋ maŋyzdy erekşelıgınıŋ bırı tülekterdıŋ äleumettık jobalarǧa belsendı aralasuy. Atap aitqanda, tülekter balalar üilerıne qaiyrymdylyq kömek körsetıp, äleumettık jaǧdaiy tömen otbasylarǧa qoldau bıldırude. Sonymen qatar qala köşelerıne aǧaş otyrǧyzyp, qoǧamdyq oryndardy kögaldandyru jäne tazalyq aksiialaryna belsendı qatysyp jatyr.
Sonyŋ ışınde №101 jalpy orta mektebınıŋ tülekterı de igı bastamadan şet qalmady. Olar balalar üilerıne arnaiy baryp, kışkentai büldırşınderge oiynşyqtar men qajettı kiım-keşekter tabystady. Tülekter balalarǧa köterıŋkı köŋıl-küi syilap, qaiyrymdylyq şarasy arqyly meiırımdılık pen janaşyrlyqtyŋ jarqyn ülgısın körsettı. Sonymen qatar mektep bıtıruşılerı özge tülekterdı de osyndai igılıktı ıs-şaralardy qoldauǧa jäne qoǧamǧa paidaly bastamalarǧa belsendı qatysuǧa şaqyrdy.
Bılım beru salasy ökılderınıŋ pıkırınşe, būl ürdıs jas ūrpaqtyŋ äleumettık jauapkerşılıgın arttyryp, mektep bıtıru mädenietınıŋ mazmūnyn özgertıp keledı. Qarapaiym formattaǧy keşter bır jaǧynan qarjylyq qysymdy azaitsa, ekınşı jaǧynan jastardy qoǧamǧa paidaly ıs jasauǧa yntalandyrady.
Osylaişa, Astana tülekterı üşın mekteppen qoştasu tek merekelık şara ǧana emes, sonymen qatar adamgerşılık pen azamattyq jauapkerşılıktı därıpteitın maŋyzdy qadamǧa ainalyp otyr.
