3 qyrkúıekte Almatydaǵy Chaplin Mega Alma-Ata kınoteatrynda IX Baiqonyr kınofestıvaliniń saltanatty ashylý rásimi ótti. Úsh júzden astam qonaq jınalǵan shara kórermenderge halyqaralyq júldelerge ıe bolyp úlgergen rejısser Kenjebek Shaıqaqovtyń «Aıqaı» fılminiń kórsetilimimen bastaldy.
Jyl saıyn kıno salasynyń úzdikterin jınap, kıno álemine endi aıaq basqan jas kınematograftarǵa bastaý bolatyn Baiqonyr kınofestıvali osymen toǵyzynshy jyl qatarynan uıymdastyrylyp otyr.
Ashylý saltanatynda alǵash sóz alǵan Baiqonyr Film Festival prezıdenti Anýar Kenjebaev bıylǵy festıvaldiń birneshe ereksheligin atap ótti. Sonyń biri - buǵan deıin Baiqonyr aıasynda uıymdastyrylyp kelgen anımaııalyq fılmder baıqaýy - Almaty Animation Festival bıyl bólek festıval retinde shildede ótti. Bul da festıval aıasyn qalaı keńeıtip jatqanyn kórsetedi.
«Kınofestıval tek jas talanttardy kórsetýmen shektelmeıdi. Biz olardy qoldap qana qoımaı, sonymen qatar kıno salasyn damytyp jatyrmyz dep oılaımyn. Munyń aıqyn dáleli - festıval aıasynda Kınotanýshylar men kınosynshylardyń III halyqaralyq forýmynyń ótkizilýi», - dedi Kenjebaev festıvalmen qatar ótip jatqan forým týraly.
Festıval dástúrli túrde TMD-ǵa qatysýshy memleketterdiń Memleketaralyq gýmanıtarlyq yntymaqtastyǵy qorynyń qoldaýymen ótedi. Sondaı-aq, Anýar Kenjebaev óz sózinde Chaplin Mega Alma-Ata kınoteatryna erekshe alǵysyn bildirip, kınoteatrdyń arqasynda bıyl burynǵydan 160 adamǵa kóbirek qonaq shaqyrý múmkindigi týǵanyn atap ótti.
IX Baiqonyr kınofestıvaliniń taǵy bir ereksheligin ataǵan baǵdarlamalyq dırektor Erjan Jumabekov bıyl alǵash ret debıýttik tolyqmetrajdy fılmder baıqaýy ótetinin aıtty.
Bıyl 20 elden kelip túsken 670 ótinimniń ishinen festıvaldiń baıqaý baǵdarlamasyna qatysatyn 34 fılm iriktelip alyndy. Baıqaýǵa Qazaqstan, Grýzııa, Ázirbaıjan, Armenııa, Ózbekstan, Tájikstan, Qyrǵyzstan jáne Reseı elderiniń ókilderi qatysyp jatyr.
«Bıyl biz Baiqonyr kınofestıvali baǵdarlamasyn maqtanyshpen usynamyz. Burynǵy festıvalderde tolyqmetrajdy fılmderdi baǵdarlamadan tys kórsetetinbiz, al bıyl baıqaý aıasynda kórsetip jatyrmyz. Qysqa metrli fılmderden ósken jas rejısserlerdiń alǵashqy fılmderin kórsetetin biregeı platforma festıval bolady dep oılaımyz», - dedi Jumabekov.
Baıqaýǵa túsken fılmder arasynan úzdikterin anyqtaıtyn qazylar alqasy da saltanatty sharada nazardan tys qalmady. Baiqonyr kınofestıvaliniń halyqaralyq baıqaýyn Qazaqstandyq qazylar alqasy baǵalaıdy, al Ulttyq baıqaýdyń jeńimpazdaryn halyqaralyq qazylar alqasy anyqtaıdy.
«Meniń oıymsha, qazir Baiqonyr kınofestıvalder arasynda monopolıst rólge ıe bolǵan sııaqty, sebebi bul - debıýtanttardyń, stýdentter men jańa esimder ashylyp, mansaby bastalatyn jalǵyz jumys istep turǵan festıval. Maǵan rejısser jáne kıno salasyndaǵy adam retinde Baiqonyr fılmderin kórý árqashan qyzyqty. Bul - ımpýls, tynys jáne álemdik arenaǵa tramplın», - dedi tanymal rejısser Ádilhan Erjanov. Ol bıyl Halyqaralyq baıqaýda baǵa beretin qazylar alqasynyń tóraǵasy.
Keıin sharaǵa jınalǵan qonaqtar asyǵa kútken Semeı polıgonymen taǵdyrlas áke men bala ómirin baıandaıtyn Kenjebek Shaıqaqovtyń «Aıqaı» fılminiń kórsetilimin tamashalady. Fılm alǵash ret Qazaqstanda kórsetilip otyr, buǵan deıin fılmniń premerasy Pýsan halyqaralyq kınofestıvalinde ótken.
IX Baiqonyr kınofestıvali 3-8 qyrkúıek aralyǵynda ótedi, baıqaýǵa túsken barlyq fılm MEGA Alma-Ata saýda ortalyǵyndaǵy Chaplin Cinemas kınoteatrynda tegin kórsetiledi. Tek tolyqmetrajdy fılmder aqyly negizde kórsetiledi, oǵan bıletti Kino.kz saıtynan, ne qosymshasynan satyp alýǵa bolady.
Sonymen qatar, III Halyqaralyq kınotanýshylar men kınosynshylar forýmy aıasynda túrli avtorlyq dárister, paneldik sessııalar men sheberlik sabaqtary AlmaU ýnıversıtetinde ótedi. Kirý tegin.
