Qostanaı oblysyna qarasty Jitiqara aýdanynyń Jitiqara qalasynyń ákimdigi "Jitiqara qalasynyń aýmaǵynda jabaıy shópti shabý jónindegi qyzmetter" degen taqyryppen tender jarııalap, atalǵan jumysqa bıýdjetten 2 678 571 teńge qarjy bóldi, dep habarlaıdy Adyrna ulttyq portaly satypalu.gov.kz saıtyna silteme jasap.
Memlekettik satyp alý týraly habarlama 4 qyrkúıek kúni jarııalanyp, tender jeńimpazy 11 qyrkúıek kúni anyqtalmaq. Tehnıkalyq sıpattamada tapsyrys oryndaýshy 43 500 sharshy metr jerdiń aram shóbin trımmermen jáne qolmen shaýyp, otap otyrýy kerektigi kórsetilgen. Saıabaq pen skverler shóbiniń bıiktigi 7 cantımetrden aspaýyn qadaǵalap, ár maýsym saıyn kemi 4 ret aram shópti otaýy tıis. Sondaı-aq, tehnıkalyq sıpattamada tapsyrys berýshiler qyzmettiń oryndalý merzimin de kórsetýdi umytpapty. Onda jumys merzimi "Shart jasaǵan sátten bastap - 2024 jylǵy qazan" dep taıǵa tańba basylǵandaı jazylǵan.
Qyzyǵy, qyzmettiń oryndalý merziminiń aıaqtalýyna, ıaǵnı 2024 jyldyń qazan aıyna deıin bar bolǵany 26 kún qaldy. Tender jeńimpazy anyqtalatyn 11 qyrkúıekten bastap eseptesek 19 kún. Munyń syrtynda taraptardyń kelisimshartqa qol qoımaı, jumysty bastamasy jáne belgili. Demek, ákimdik aınaldyrǵan 15 kún ishinde "ár maýsym saıyn" kemi 4 ret aram shópti otatyp, saıabaq pen skverler shóbiniń bıiktigi 7 cantımetrden aspaýyn qadaǵalaı ala ma?
15 kúnde 43 500 sharshy metr jerdiń aram shóbin bir ret shaýyp shyǵýǵa ábden bolady. Biraq, aýmaǵynyń basym bóligi tehnıkanyń kúshimen, ıaǵnı trımmermen shabylatyn shóp úshin bıýdjetten 2 678 571 teńge bólý qanshalyqty ádiletti? Jetiqara qalasynyń ákimi aram shópti emes, aram aqshany otap jatqan joq pa?
Bul suraqtardy tıisti mekemege joldadyq. Olardan jetken jaýapty aldaǵy ýaqytta jarııalaıtyn bolamyz.
Aqan Birlik
"Adyrna" ulttyq portaly
