Otandyq medıa ókilderi alty aıdan astam ýaqyt komada jatqan ulttyq ulan sarbazy Erbaıan Muhtardyń isin muqııat baqylaýdy talap etýde, dep habarlaıdy “Adyrna” ulttyq portaly.
Otan aldyndaǵy boryshyn óteýge ketip, múgedek kúıde oralǵan Erbaıan Muhtar esimdi sarbazdyń jaı-kúıi medıa ókilderin de alańdatýda.
Jýrnalıst Dınara Sátjan Qorǵanys mınıstrligine úndeý jasap, isti baqylaýda ustaýyn tapsyrdy.
“Isti muqııat tekserý kerek. Qorǵanys mınıstrligi oqıǵanyń sebebin anyqtaý kerek. Meniń ulym da qazir áskerı boryshyn ótep jatyr. Biz komandırlerine senim artamyz. Biraq olardyń qatarynda jaqsy adamdar bola bermeıdi eken. Erbaıannyń basynan ótkeni kezdeısoq oqıǵa emes ekeni anyq. Deni sap-saý jigit otbasyna múgedek bolyp oraldy. Bul oqıǵa bolmaýy kerek edi. Ásker qaýipsiz bolýy kerek emes pe?! Ol jaqta qarny toq, deni saý qoryqpaıtyn sarbazdar ǵana qyzmet etedi. Al komandırler ákelerindeı qaraıtyn myqty adamdar bolýy kerek”, – dedi jýrnalıst.
Odan keıin akter Táýekel Músilim de áskerde boryshyn ótep jatqan sarbazdarǵa alańdaıtynyn jetkizdi.
“Osynda jaǵdaıdan keıin uldarymyzdy áskerge qalaı jiberemiz?! Sarbazdarymyzdy múgedek etetin ásker bizge ne úshin qajet?”, – dep ashyndy akter.
Sonymen qatar ánshi Saltanat Baqaeva da sarbazdyń alǵan soqqysyn jaýyzdyq dep boljady.
“Osydan keıin qalaısha balańdy áskerge jiberesiń. Almatynyń irgesindegi áskerı bólimshede bolyp jatqan oqıǵa. Basqa qalalardy ne bolyp jatqanyn oılaýdyń ózi qorqynyshty. Ne degen jaýyzdyq! Ata-anasyna kúsh-qýat bersin!”, – dep jazdy aktrısa.
Eske salaıyq, Bas áskerı prokýratýra alty aıdan beri komada jatqan sarbaz Erbaıan Muhtardyń isine qatysty málimdeme jasaǵanyn jazǵan edik.
