Parıj Olımpıadasynyń alǵashqy alty kúndiginde el sportshylary bir altyn men eki qola enshilep, týrnır kestesinde 18-orynda tur. Al altynnan alqa taǵynady dep el sengen boksshylar alǵashqy jekpe-jekten jeńilis taýyp, sengen jurttyń synyna ushyraýda.
Búgingi materıalda qoǵam belsendileri men sport synshylary Olımpıadaǵa qatysyp jatqan bylǵary qolǵap sheberleri jaıly jazǵandaryna sholý jasap kórelik.
SÓNGEN SENIM
28-shilde kúni bokstan Qazaqstan komandasynyń kapıtany Aslanbek Shymbergenov Parıj Olımpıadasyndaǵy alǵashqy jekpe-jeginde utylyp qaldy. 71 keli salmaqta alǵashqy jekpe-jegin ótkizgen Shymbergenov ıordanııalyq Zeıad Ishaıshke jol berdi. Odan soń ile-shala el úmit artqan 92 keliden joǵary salmaqta judyryqtasatyn Qamshybek Qońqabaev Eýropa chempıony (2023), bıyl álem chempıonatynda qola júlde alǵan ıspanııalyq Aıýb Gadfa Drıssıden jeńildi.
Al 31 shildede Mahmud Sabyrhan birinshi aınalymda ıspanııalyq Hose Kıleske ese jiberdi. Ispandyq atlet birinshi raýndta 4:1, ekinshi raýndta 5:0, al úshinshi raýndta 3:2 esebimen basymdyq tanytty.
Al qyzdar komandasynan 75 kelige deıingi salmaqta judyryqtasqan Valentına Halzova da alǵashqy synda Panamalyq Ateına Baılonǵa ese jiberdi.
Keshe, 1 tamyz kúni el sengen qos boksshy Aıbek Oralbaı men Muhamedsabyr Bazarbaı jartylaı fınalǵa óte almady. Shırek fınaldaǵy saıysta tóreshilerdiń sheshimi boıynsha Aıbek Oralbaı ázirbaıjandyq boksshydan, al Muhamedsabyr Bazarbaı grýzındik sportshydan jeńildi.
TÓREShILERGE TÓRELIK QANDAI BOLMAQ?
Tóreshilerdiń sheshimin ádiletsiz dep baǵalaǵan Qazaqstan Ulttyq Olımpıadalyq komıteti Parıj Olımpıadasynda 63,5 keli salmaqta judyryqtasqan Muhammedsabyr Bazarbaıuly men grýzııalyq Lasha Gýrýlı arasyndaǵy jekpe-jek nátıjesin túsindirýdi talap etip, resmı túrde PBU-ǵa (Paris boxing Unit) shaǵym túsirdi.
«Biz bul nátıjemen kelispeımiz jáne PBU-dan túsiniktime talap ettik. Budan HOK ta habardar. Bizdiń oıymyzsha, qazaqstandyq boksshy 2024 jylǵy Olımpıadanyń jartylaı fınalyna joldama beretin mańyzdy kezdesýde jeńiske jetti. Ótken jekpe-jektiń nátıjesin qaıta qaraý múmkin emestigin de túsinemiz. Alaıda, biz iri halyqaralyq jarystaǵy tórelik ádil ári taza bolǵanyn qalaımyz», - dedi Qazaqstan UOK bas hatshysy Janar Ýtesheva.
Buǵan deıin UOK qazaqstandyq boksshylardyń jekpe-jeginde jumys istegen keıbir tóreshilerdiń qyzmetine kúmán keltiretinin málimdep, PBU-ǵa (Paris boxing Unit) júgingen edi.
Olımpıada oıyndaryndaǵy boks básekesin uıymdastyrýshylar bul eskertýge nazar aýdaryp, atalǵan jaǵdaıǵa qatysty zertteý júrgizýge ýáde berdi. Atalǵan tóreshilerge qatysty is qozǵaldy. Alaıda, erejege sáıkes, aıaqtalǵan jekpe-jekter nátıjesi qaıta qaralmaıdy. Alaıda tóreshilerdiń óz qyzmetinde qatelik jibergeni dáleldense, olar qyzmetten shettetilýi múmkin.
KIMDER QALDY?
Erler quramynan sharshy alańdaǵy teketireske ókinishke qaraı, eki boksshymyz ǵana baq synaıdy. Olar – 51 keli salmaqta bokstasatyn Sáken Bıbosynov pen jartylaı aýyr salmaqta (81 kg) judyryqtasatyn Nurbek Oralbaı. Ekeýiniń de shırek fınaldaǵy jekpe-jegi búgin, 2 tamyzda ótedi. Sáken Bıbosynov Túrkııadan kelgen Samet Gýmýsqa, al Nurbek Oralbaı ázirbaıjandyq Mýrad Allahverdıevke qarsy shyǵady.
Áıelder quramynan Nazym Qyzaıbaı shırek fınalda brazılııalyq Karolın Barbosany aıqyn basymdyqpen utty. Endi onyń kelesi jekpe-jegi kolýmbııalyq Valensııa Vıktorııa Ingrıt Lorenamen ótedi.
“NE ISTEP JÚRSIŃDER ShUBYRYP BÁRIŃ?..”
El sengen sportshylardyń alǵashqy jekpe-jegindegi sátsizdigin jelide kópshilik synǵa alýda. Beıjiń Olımpıadasynyń chempıony, boksshy Baqyt Sársekbaev boksshylarmen qosa, bapkerdi, jattyqtyrýshy komandany Sabyrhannyń jeńilisinen keıin sógip tastady:
“Jigitterdiń fızıkasy óte nashar! Ekinshi raýndta demalystary qıyndap, áreń júr rıngte. Ýdarlary az. Kombınaııa ýdarov tipti az. 3 mınýtta qansha ýdar jaýdyrýǵa bolady?! Fızıkasymen aınalysýǵa arnaıy shaqyrtylǵan kýbalyq maman qaıda qarap júr? elaıa naýchnaıa grýppa qaıda? Nege bizdiń bokserlar demi jetispeı júr? Úsh raýnd aıaqta tura almaıdy. Ne istep júrsińder shubyryp báriń? Birinshi boıdan óte almady degen ne sumdyq???
Bir suraq: árbir bokser lıenzııa alǵannan Olımpıadaǵa deıin neshe boı ótkizdi? Praktıka bar ma? Mysaly, men jarty jylda 22 boı ótkizdim. Bas bapkerge aıtatyn sózim joq tipti,” - dep jazdy ol.
Bokstan Qazaqstan quramasynyń burynǵy bas bapkeri Tursynǵalı Edilov (onyń basshylyǵymen boksshylarymyz Sıdneı Olımpıadasynda tarıhtaǵy eń úzdik nátıjege qol jetkizgen edi) Sabyrhannyń sensaııalyq jeńiliske ushyraýynyń sebepterin saraptap berdi.
“Ispandyq óte jaqsy jekpe-jek ótkizdi. Ol óziniń boıynyń artyqshylyǵyn paıdalanyp, jaqsy qozǵalyp, Mahmudqa birneshe ret kúshti soqqy berdi. Sabyrhannyń jekpe-jekke jospary bolmaǵan sııaqty. Nurbek Oralbaı sııaqty syrtqa shyǵyp, qarsylasyn kespek boldy. Biraq Nurbektiń joly boldy, ol tehnıkamen jekpe-jekke shyqpaǵanymen, Kıljes tehnıkaly, oıynshy. Eń soraqysy men Sabyrhandaǵy shaıqastyń kelbetin kórmedim. Buryn ol qýlyqpen qarsylastaryn julyp alatyn, aldaıtyn. Munda ol tek óz kúshine súıendi. Biraq bul da jetkiliksiz boldy! Úshinshi raýndta baryp shabý kerek ekeni bárine túsinikti bolǵanda, ol muny isteı almady. Múlde kúsh bolmady,” - dedi ol.
Al sport jýrnalısi Leonıd Iýrev búgingi boksshylardyń áreketine tómendegideı baǵa berdi:
«Mahmut Sabyrhan Olımpıadalyq salmaqqa 13 aıdan sál astam ýaqyt buryn kóterildi. Bul tipti qarsy shabýylǵa shyqqan ıspandyqty jeńýge de jetpeıdi. Nelikten ol 54 keliden erterek ketpedi? Meniń oıymsha, bunyń jaýaby qarapaıym: álem chempıonatyndaǵy sándi premıýmdar úshin. Al ishki sezimderi - salmaq qosý óte ońaı degen bolar. Ol úlken qate. Bizdiń boksta bári jaqsy ma? Olaı bolsa, Myrzaǵalı Aıtjanovty taǵy júz jylǵa ulttyq quramada qaldyraıyq. Sosyn biz kem degende bir Olımpıada qolasyn qanaǵat tutarmyz», - dep jazdy Iýrev sársenbi kúni óziniń Telegram-kanalynda.
Keshegi Aıbek Oralbaı men Muhamedsabyr Bazarbaıdyń jeńilisine qalyń jurt tóreshilerdi kinálaýda. “Ádil baǵa bermedi”, “endi eshkimnen úmit kútip kerek emes” dep qazaq qoǵamynyń saǵy syndy. Al attasynyń jeńilisine kúıingen sport jýrnalısi Aıbek Qabylsha bapker durys baǵyt-baǵdar bermedi deıdi:
“Qazir ǵana Aıbek Oralbaıdyń jekpe-jegin júrgizip shyqtym. Ókinishti. Dál osy jekpe-jektegi jeńiliste Myrzaǵalı Aıtjanov kinálideı kórindi. Aıbek birinshi raýndta qarsylasty byt-shyt qylyp jeńdi. Óziniń jeńiske degen qushtarlyǵymen, minezimen qarsylasyn taptap tastady. Boldy ǵoı, osy taktıkany jalǵastyra berý kerek edi. Arqasynan qaǵyp, “erkeksiń, jaraısyń, alǵan betińnen taıma!” deýdiń ornyna “qorǵan, abaıla, saq bol” deýdiń keregi joq edi. “Alǵashqy raýndta tórt tóreshi seni qoldady, kelesisinde de osylaı judyryqtas. Osy betińnen taımashy. Osy raýndty alsań, kelesi kezeńge ótip tursyń ǵoı” degen qoldaý bildirý kerek edi. Jas býynnyń jalynyn osylaı sóndiremiz ǵoı” dep kúrsindi ol.
Dına Lıtpın
“Adyrna” ulttyq portaly
