Qyrǵyzstanda úsh almatylyq jáne bir máskeýlik alpınıst qar kóshkininiń astynda qaldy, bireýi qaza tapty, dep habarlaıdy “Adyrna” ulttyq portaly.
«29 shilde. Han Táńiri ekspedıııasy 2024. 5050 m bıiktikte, 8.15-te, Han Táńiriniń ońtústik jaǵyndaǵy «bótelkege» kire beriste, tórt adamnan turatyn top qar kóshkini astynda qaldy: Borıs Dedeshko (Almaty), Pavel Blajnov, Marıanna Petrova (Almaty), Alekseı Smırnov (Máskeý). Bizdi ózimiz qazǵan shuńqyr qutqardy. (...) Biz arshyp alýǵa tyrystyq, biraq nátıje bolmady. Ylǵaldy qar muzǵa aınalyp, saýsaqtarymyz qozǵala almaı, tońyp qaldy. Qar kóshkini bizdi tassha qatyrdy», - dep bólisti alpınısterdiń biri Pavel Blajnov áleýmettik jelidegi paraqshasynda.
Alpınıst qar kóshkini astynda 40 mınýttan astam ýaqyt bolǵanyn habarlady.
«Biz bazamen radıo arqyly D.Grekovpen baılanysqa shyqtyq, tórt jolserikten turatyn top bizden 20 mınýt joǵaryda júrdi, topty Vıtalıı Akımov basqardy. Biz olarǵa qaı jerde ekenimizdi sıpattadyq. Jigitter bizdi izdeı bastady, izdeý sharalary uzaqqa sozyldy. Barlyǵy 3 metrlik kóshkinniń astynda 40 mınýttan astam ýaqyt ótkizdik. Alekseı sol jerde qaza tapty, ol shuńqyrǵa jasyrynyp úlgermedi, ol 1,5 metrge jetpedi, sirá, rıýkzagyn tastaǵysy kelmedi», - dep qosty Blajnov.
Sondaı-aq ol qaıtys bolǵan alpınıstiń denesin arshý jumystary 2 tamyzda bastalatynyn qosty.
«Olar bizdi arshyp alǵan soń, taǵy da qar kóshkini júrip, zattarymyz jan-jaqqa shashyrady. Eshqandaı zardaby tımedi. Biz Alekseıdi tastap, 4 myń metrlik bazaǵa qaraı uzaq tómen túsýdi bastadyq. 2 tamyzda Alekseıdi arshyp alý jáne túsirý jumystary bastalady», - dep túıindedi alpınıst.
