QR Parlament Májilisiniń depýtaty Murat Ábenov elimizdi qara oranǵandardyń kóbeıip bara jatqanyna alańdaýshylyq bildirdi, dep habarlaıdy “Adyrna” ulttyq portaly. Bul týraly ol Nurlan ımamnyń vıdeosymen jelide bólisip, óz oıyn jazdy.
Depýtat ýaǵyz aıtatyn ımamdar resmı túrde Mýftııatqa qatysty tek Ábý Hanıfa mazhabyn ustanatyndar ǵana bolýy mindetti ekenin aıtty.
"Óz-ózin “ustaz” dep ataıtyn, túsiniksiz aǵymdardyń ókili emes. Sońǵy kezde qazaq ultynyń ejelden kele jatqan anaý dástúri haram, mynaý zaty sáıkes kelmeıdi, myna kıim durys emes dep arańdatatyn “ýaǵyz” aıtatyndar kóbeıdi", - dedi Murat Ábenov.
Sondaı-aq, ol salt-dástúrdi dáripteýde de dinniń shıelenisip ketkenin jasyrmady.
“Dombyra tartpa, sálem salma, betti ashpa, tusaý kespe” - dep halyqty ashýyn týǵyzatyn nasıhatshylar paıda boldy. Qazaq ıslam dininiń "Ábý Hanıfa" mazhabyn, ıaǵnı Hanafı baǵytynyń baıyrǵy túrkilik salt-dástúrdiń ıslam dinine qaıshy kelmeıtin tustaryn saqtap qabyldaǵan. Mysaly qazaq dalasynda adam qaıtys bolǵannan keıin dúnıe-múlkimen, mingen atymen jerleý dástúri bolǵanyn arheologııalyq qazbalardan kóremiz. Olar ıslamǵa qaıshy keletin bolǵasyn osy jerde turǵandar sol baıaǵy kezderde ol dástúrden bas tartqan. Demek, qazaqtyń osy kezge deıin ornyqqan salt-dástúrleriniń bári dinmen úılesken , sáıkes keltirilgen ulttyq qundylyq. Olardy qazir revızııa jasap, joqqa shyǵarýdyń qajeti joq. Bizge Hanafı mázhaby Islam qundylyqtaryn ulttyq salt-dástúrlermen utymdy ushtastyra bilgeni úshin asa mańyzdy", - dedi depýtat.
Al Nurlan ımam Tık tok jelisindegi tikeleı efırinde qoǵamda qara kıinetinderdiń isi qazaqy salt pen sanaǵa qaıshy ekenin jetkizdi.
