Almaty oblysynda «Jasyl el» jastar eńbek jasaǵynyń XX maýsymy ashyldy, dep habarlaıdy “Adyrna” ulttyq portaly.
Elimiz boıynsha «Jasyl el» baǵdarlamasy 2005 jyldan beri júzege asyp keledi. Joba jasóspirimder men jastar arasynda qorshaǵan ortany qorǵaı otyryp, eńbekke aralastyrý arqyly tabıǵatty kútip baptaýǵa baýlıdy.
Aǵymdaǵy jyly oblys boıynsha «Jasyl el» eńbek jasaǵyna 14 pen 35 jas aralyǵyndaǵy 1000-nan asa jas sarbaz tartylyp, maýsymdyq jumyspen qamtylady. Atalmysh joba áleýmettik osal, kópbalaly otbasylardyń balalaryn, NEET sanatyndaǵy jastardy qoldaýǵa baǵyttalǵan.
Aldaǵy eki aı kóleminde jas sarbazdar óńirdi abattandyryp, óz ólkesin kógaldandyryp qana qoımaı, tıisti eńbekaqysyn alyp, arnaıy kıimdermen qamtamasyz etiledi. Osylaısha oblys jastary «Taza Qazaqstan» jalpyulttyq eko-naýqanynyń aıasyndaǵy jumysty jalǵastyryp oblystyń ekologııasyn jaqsartýǵa úles qospaq.
Shara barysynda oblys ákiminiń orynbasary Almas Batanov «Jasyl el» baǵdarlamasy jastar úshin óńirdegi eń tabysty jáne aýqymdy áleýmettik jobalardyń biri ekenine toqtalyp, dástúrli eńbek maýsymynyń ashylýymen oblys ákiminiń atynan quttyqtaý tilegin jetkizip, aldaǵy jumystaryna tabys tiledi.
Saltanatty ashylý rásiminen keıin, «Jasyl el» sarbazdary jumystaryna birden bilek sybana kirisip Qapshaǵaı sý qoımasynyń jaǵalaýynda tazalyq jumystaryn júrgizip, demalýshylar arasynda ekologııalyq mádenıetti qalyptastyrý, qorshaǵan ortany lastamaý boıynsha aqparattyq túsindirme akııasyn ótkizdi.
