Elimizdiń 4 óńirinde dinı radıkaldar ustaldy. Olar Astana, Shymkent qalalary men Atyraý, Jambyl oblystarynda áreket etken. Bul týraly búgin, 12 shildede UQK baspasóz qyzmeti aıtty, dep habarlaıdy «Adyrna» tilshisi.
«4 qazaqstandyq pen 1 sheteldik terrorıstik áreketterge qatysýǵa, ekstremıstik áreketterdi uıymdastyrýǵa jáne osy maqsatta adamdardy tartýǵa degen kúdikpen ustaldy. Olardyń turǵylyqty jerlerinen kóptegen dinı-ekstremıstik ádebıet pen ózge de zattaı dáleldemeler alyndy»,—delingen habarlamada.
UQK málimetinshe, kúdiktilerdiń biri buǵan deıin shet memlekettiń aýmaǵynda soǵys áreketterine qatysyp, ol úshin Qazaqstanda sottalǵan.
Taǵy ekeýine qatysty «aýyr» esirtkini únemi qoldanǵany týraly aqparat tekserilýde.
