Qyrǵyzstanda prezıdent Sadyr Japarovtyń qaryndasynyń kúıeý jigiti ustaldy. Aqparatty memleket basshysynyń ákimshiligi rastady, - dep habarlaıdy "Adyrna" ulttyq portaly.
Sadyr Japarovtyń baspasóz hatshysy Asqat Alagózov Facebook jelisindegi paraqshasynda Qyrǵyzstan prezıdentiniń inisiniń qyzynyń kúıeý jigitin quqyq qorǵaý organdary ustaǵanyn rastady.
«Lázzat Nurqojaevanyń kúıeý jigiti oǵan tikushaqpen turmysqa shyǵý týraly usynys jasaǵannan keıin tanymaldylyqqa ıe boldy. Bul jas jigittiń basty maqsaty onyń zańsyz áreketterin qorǵaý úshin bılik basyndaǵy adamdarmen baılanys ornatý boldy («shatyr izdeý») dep aıtýǵa tolyq negiz bar», - dep atap ótti Asqat Alagózov.
Ol prezıdent Sadyr Japarov kim bolsa da, kimi bolsa da zańsyz áreketterdi jasyrmaıtynyn, qorǵaýǵa tyryspaıtynyn basa aıtty.
Atap ótkendeı, jigit pen onyń sybaılastarynyń zańsyz áreketteriniń jaı-japsary tergeý barysynda naqtylanady.
Qyrǵyz aqparat quraldary jaqynda Tótenshe jaǵdaılar mınıstrliginen tikushaq jaldap turmysqa shyǵýǵa usynys jasaǵan el prezıdentiniń qaryndasy Lázzat Nurkojoevanyń kúıeý jigiti Aftandıl Sabyrbekov ekenin habarlady. Oqıǵadan túsirilgen vıdeo qoǵamda úlken rezonans týdyrǵan soń, Sadyr Japarov bolashaq kúıeý balasynyń ysyrapshyldyǵy úshin keshirim suraýǵa májbúr boldy.
