Memleket basshysy Qasym-Jomart Kemeluly Toqaev «Elimizdiń jas býyn ókilderiniń balalyq shaǵy baqytty ótip, deni saý, jan-jaqty azamat bolyp ósýine jaǵdaı jasaý – strategııalyq mańyzy bar mindet. Bul – Qazaqstannyń jarqyn bolashaǵynyń kepili» degen. Búginde balalar úshin memleket tarapynan jan-jaqty qoldaý sharalary júzege asýda. Olarǵa qolaıly orta qalyptastyrý, sapaly bilim berý, bos ýaqytyn tıimdi uıymdastyryp, qaýipsizdigin qamtamasyz etý memlekettiń basty mindetteriniń biri bolyp tabylady. Onyń ishinde balalardyń jazǵy demalys lagerin uıymdastyrýdyń mańyzy zor.
Aýdanymyzda oqýshylardyń jazǵy demalysyn jáne bos ýaqytyn uıymdastyrý, saýyqtyrý maqsatynda aǵymdaǵy jyldyń 3-28 maýsym aralyǵynda 4 kezeńdi qamtyǵan mektep janyndaǵy lager uıymdastyryldy. Mektep janyndaǵy lagerlerge jalpy 4222 oqýshy qatysty. Onyń ishinde mektep janyndaǵy ınternaty bar 12 mektep jáne A.Orazbaeva, K.Mendalıev, Ǵ.Moldashev atyndaǵy jalpy orta bilim beretin mektepterinde 1442 balaǵa ystyq tamaqpen qamtylǵan mektep janyndaǵy lager qyzmet atqarsa, 20 bilim ordasynda ystyq tamaqpen qamtylmaǵan 2780 oqýshyǵa lager uıymdastyryldy.
Mektep janyndaǵy lagerler joǵaryda atap ótkenimizdeı balalardyń bos ýaqytyn tıimdi ótkizý, sportqa, shyǵarmashylyqqa baýlyp, rýhanı jáne fızıkalyq damýyn qalyptastyrý baǵytynda uıymdastyryldy. Balalardyń ár kúnin qyzyqty ótkizý maqsatynda túrli taqyryptyq chellendjder, tanymdyq saǵattar, sporttyq jarystar, psıhologııalyq trenıngter, ıntellektýaldyq oıyndar uıymdastyrylyp, jetekshi ustazdarymyz ózderiniń biliktilikteri men kásibıligin tanyta bildi.
Balalardyń densaýlyǵy basty nazarymyzda. Mektep janyndaǵy lagerler medıına salasynyń mamandarymen qamtamasyz etildi. Atalǵan aralyqta balalardyń densaýlyǵyna qaýip tóndiretin oqys oqıǵa tirkelmegendigin atap ótkenimiz jón. Áıtse de, balalardyń fızıkalyq damýyn arttyrý maqsatynda tańǵy jattyǵýlar, salaýatty ómir saltyn nasıhattaý maqsatynda taqyryptyq is-sharalar ozdyryldy. Orta býyndy medıına qyzmetkerleri oqýshylarǵa aqparattyq túsindirý jumystaryn únemi júrgizip otyrdy.
Oqýshylardyń tanymyn keńeıtý de bizdiń nazarymyzdan tys qalmady. Bul baǵytta balalarǵa «Aqpáter» tarıhı-ólketaný mýzeıi, «Kókterek» tarıhı-ólketaný mýzeıi, Bókeı Ordasy aýdanyndaǵy «Han Ordasy» mýzeı-qoryǵyna ekskýrsııalar uıymdastyryldy. Sondaı-aq balalar oblys ortalyǵyndaǵy H.Esenjanov atyndaǵy oblystyq balalar jáne jasóspirimder kitaphanasyna baryp, rýhanı azyq aldy. Osy tusta lagerlerde balalardyń kitap oqýǵa qyzyǵýshylyǵy qalyptasyp, oqyǵan kitaptaryn bir-birimen talqylaǵandyǵyn da atap ótken jón.
Balalar elimizdiń erteńi desek, olardyń búginine nazar aýdarýymyz qajet. Olarǵa sapaly bilim berip, demalysyn tıimdi uıymdastyrý basty mindetimiz.
Sýıeshova Jazıra Jangeldiqyzy
Kaztalov aýdandyq bilim berý bóliminiń tárbıe isi jónindegi ádiskeri
