Qyrǵyzstannyń arnaıy qyzmeti uıymdasqan qylmystyq topty qarjylandyrdy degen kúdikke ilingen qazaqstandyq kásipker Vladımır Jumanbaevqa qatysty qylmystyq isti tergeýdi toqtatty. Bul týraly búgin, 20 maýsymda eldiń Ulttyq qaýipsizdik komıteti aıtty, dep habarlaıdy «Adyrna» tilshisi.
Qazirgi tańda «Kazakhmys Holding» JShS top-menedjeriniń Bishkekte ekeni belgili boldy.
«19 maýsym kúni quzyrly organdar Jumanbaevtyń qatysýymen jedel-izdestirý sharalaryn júrgizdi. Nátıjesinde oǵan taǵylǵan aıyptar alynyp tastaldy. Kásipkerge qatysty sotqa deıingi óndiris toqtatyldy», - delingen UQK habarlamasynda.
Aıta keteıik, 5 maýsymda Qyrǵyzstannyń Ulttyq qaýipsizdik komıteti qazaqstandyq bıznesmen, «Kazakhmys Holding» JShS-nyń top-menedjeri Vladımır Jumanbaevqa halyqaralyq izdeý jarııalady. Mıllıarder qyrǵyzstandyq birlesken qylmystyq uıym múshesi Asanbek Kólbaevtiń jumysyn qarjylandyrdy degen kúdikke ilingen edi. Sol kúni holdıngtegiler Vladımır Jumanbaevtyń UQMK habarlamasynda kórsetilgen qurylymdarǵa qatysy joq ekenin málimdedi.
Forbes aqparatyna súıensek, Vladımır Jumanbaev Qazaqstandaǵy eń dáýletti adamdar tiziminde 25-orynda tur. Oǵan «Altyn Almas» AQ 20% tıesili. Sondaı-aq, «Qarajyra» AQ 20%, «Benkala» taý-ken kompanııasy, «Ronson-2000» JShS jáne «Vertex Holding» tıesili.
