Tótenshe jaǵdaılar mınıstri Shyńǵys Árinov tótenshelikterdiń 90 paıyzy páterge muqtaj ekenin aıtty, dep habarlaıdy "Adyrna" ulttyq portaly.
Úkimet otyrsynan keıin jýrnalıster «Siz mınıstr bolyp kelgende «eń basty másele qutqarýshylardyń páter máselesi» degen edińiz. Qansha qutqarýshy páterge zárý jáne oǵan bıýdjetten qansha qarjy bóliný keregi týraly esep bar ma?» dep surady.
«Qazirgi tańda mınıstrlik tarapynan barlyq qajetti sharalardy qabyldap jatyrmyz. Búkil qajetti kelisimder bar. Biraq zań turǵydan áli bul suraqty sheshken joqpyz. Bizdiń oıymyzsha, qyrkúıekten bastap Parlamentke Zańǵa arnaıy ózgerister engizemiz. Eń basty másele – turǵyn úı tólemderin alý. Bizdiń jospar boıynsha kelesi jyldyń birinshi qańtarynan bastap osy máseleni sheshemiz dep oılaımyn. Jalpy tótenshelikterdiń 90 paıyzy páterge muqtaj dep sanaımyz. Bizdiń qyzmetkerlerdiń kóbisi turǵyn úıge muqtaj, sondyqtan eń basty másele osy bolyp tur», – dedi mınıstr.
