Germanııada iz-tússiz joǵalyp ketken qazaqstandyq áıel óli kúıinde tabyldy. Bul týraly Syrtqy ister mınıstrligi málimdedi, dep habarlaıdy “Adyrna” ulttyq portaly.
Qazaqstannyń Syrtqy ister mınıstrligi 16 maýsymda Germanııanyń Benshaım qalasynyń mańynda áıeldiń máıiti tabylǵanyn habarlady. Sot sarapshylary saraptama júrgizedi. Polıeılerdiń aýyzsha aldyn ala málimeti men máıittiń syrtqy belgileri boıynsha tabylǵan dene Aıgúl Saılybaevaǵa tıesili.
«Qazirgi ýaqytta marqumnyń týystary Germanııada jáne olarǵa barlyq qajetti konsýldyq-quqyqtyq kómek kórsetilýde. Germanııanyń quqyq qorǵaý organdary tergeý júrgizip jatyr. Bul iske qatysty basqa aqparat tergeý múddesi úshin jarııalanbaıdy», - delingen SIM habarlamasynda.
Aıta keteıik, Aıgúl Saılybaeva – buryn Astana qalasy Saryarqa aýdanynyń sýdıasy bolyp qyzmet etken, sondaı-aq ol «Bolashaq» baǵdarlamasynyń túlegi.
1984 jyly týǵan Qazaqstan azamaty 2019 jyldan beri kúıeýi Aleksandrmen birge Frankfýrtten 40 shaqyrym jerdegi Benshaım qalasynda turyp jatqan. Týystary Aıgúldiń otbasynan jábir kórip júrgeni jaıly tis jarmaǵanyn, tek dostaryna ǵana baıandaǵanyn aıtady. Olar 5 maýsymda Frankfýrt qalasyndaǵy Qazaqstannyń bas konsýldyǵyna 2024 jylǵy 3 maýsymda qyzynyń joǵalyp ketkenin aıtyp aryz túsirgen.
