Almaty oblysy Jambyl aýdanynda eki myńdaı esek baǵyp otyrǵan sharýashylyq bar. Ákimdiktiń málimetine sáıkes, sharýa qojalyǵynda alǵashqy kezde malǵa azyq bolatyn daqyldardy ósirý josparlanǵan, dep habarlaıdy “Adyrna” ulttyq portaly QazAqparatqa silteme jasap.
«KazAgroMaks» qojalyǵynyń ıesi Maksım Pojıgaılov ta bul aqparatty rastap otyr. Onyń aıtýynsha, kásipker 1400 ga jerdi 2024 jyldyń aqpan aıynda sheteldik ınvestorlardyń kómegimen satyp alǵan.
Sondaı-aq ferma ıesi sharýa qojalyǵynda agrarlyq ispen qatar tuıaqty janýarlardy baǵyp, olardy tirideı shetelge eksporttaý josparlanǵanyn aıtty. Jem-shóp egilgen egistiń esebinen alynbaq bolǵan.
- Egistikpen qatar, Qytaıǵa janýarlardy tirideı eksporttaý josparlandy. Sebebi, bizdiń seriktesimizdiń Qulja qalasynda fermasy bar. Ol sút saýýmen aınalysady. Bul sút onkologııalyq aýrýhanalarǵa jiberiledi. Sebebi, esek sútinde kazeın aqýyzy kóp, ol ókpe men baýyrdy emdeýge kómektesedi. Biraq bul bizdiń elimiz úshin jaramaıdy. Sondyqtan tek eksport jasaý josparlandy, ıaǵnı shaǵyn ekonomıkalyq orta qalyptastyrǵymyz keldi. Osynda daqyldardy egemiz. Ony malǵa berip, keıin eksportqa jiberemiz, - dedi Maksım Pojıgaılov.
Aýdan ákimdiginiń málimetinshe, kásipker 2024 jyldyń naýryzynda Jetisý oblysynan jalpy sany 1405 esekti veterınarlyq anyqtamasymen satyp alǵan. Búgingi kúni sharýa qojalyǵynyń aýmaǵynda 1700 esek bar jáne onyń 1032-si veterınarlyq pýnktte tirkelgen.
Sharýa qojalyǵynda búgingi kúni 4 adam jumys isteıdi. Olardyń biri – Erkin Qojabergen. Mal baǵýmen 25 jyldaı aınalysqan ol bul qojalyqqa bıyl qys kezinde kelgen.
Onyń aıtýynsha, esek asyraýdyń ózindik qıyndyǵy bar, jylqy tektes bul janýardy qoı ne jylqy sekildi jazyq dalada jaıa almaısyń.
- Esekti birinshi ret baǵyp otyrmyn. Bular jylqy tektes. Biraq ózge mal sekildi bastary birikpeıdi. Jaısań jan-jaqqa ketip qalady. Sol úshin qamap otyrmyz. Sondaı-aq minezderi shataq. Bir-birimen óte jıi tóbelesedi. Ózderi sýyqty kótermeıdi, al ystyqta sýdy kóp ishedi. Biraq bir jaqsy qasıeti – shóp talǵamaıdy, – dep atap ótti ol.
Maksım Pojıgaılov alǵashqy jospary ózgergenimen, esekti tirideı Qytaıǵa eksporttaýdy áli de josparlap otyrǵanyn aıtady. Onyń aıtýynsha, osy ýaqytqa deıin eksport jasalmaǵan. Alaıda janýarlardyń alǵashqy tasymaly aldaǵy aıda oryndalýy múmkin.
