Olıı Májilisi Zań shyǵarý palatasynyń bir top depýtaty ózbek halqyna til tıgizgen shetel azamattarynyń elge kirýine tyıym salatyn zań jobasyn ázirledi. Bul týraly parlamenttiń tómengi palatasynyń baspasóz qyzmeti aıtty, dep habarlaıdy «Adyrna» tilshisi.
Depýtattar «Shetel azamattary men azamattyǵy joq adamdardyń Ózbekstan Respýblıkasyndaǵy quqyqtyq jaǵdaıy týraly» zańǵa ózgerister men tolyqtyrýlar engizý kerektigin aıtty.
«Zań jobasy Ózbekstannyń memlekettik egemendigin, aýmaqtyq tutastyǵy men qaýipsizdigin nyǵaıtýǵa, eldegi memleketaralyq, ultaralyq, konfessııaaralyq kelisimdi qorǵaýǵa jáne Ózbekstan halqynyń ar-namysy, qadir-qasıeti men tarıhyna qurmetpen qaraýdy qamtamasyz etýge baǵyttalǵan», - dedi olar.
Bılikke el men ultty qorlaǵan sheteldikter úshin respýblıkaǵa kirýge, onda banktik shottar ashýǵa, jyljymaıtyn múlik satyp alýǵa, memlekettik múlikti jekeshelendirýge qatysýǵa, qarjylyq jáne sharttyq qatynastarǵa túsýge besjyldyq tyıym salý usynyldy.
Eske salaıyq, 2021 jyly Ózbekstanda prezıdent tarapyna qorlaý nemese jala jabý deregine qatysty qylmystyq jaýapkershilik engizildi. Buǵan deıin memleket basshysyn «balaǵattady» degen 10 adamnyń sottalǵanyn jazǵan edik.
