Jambyl oblysynda áskerde taǵy da álimjettik oryn aldy. Óz erkimen 17 mamyrda áskerge attanǵan sarbaz Nurjigit Asanuly jansaqtaý bólimine túsken. Bul týraly “Adyrna” ulttyq portalyna Nurjigittiń anasy Janalına Janna habarlasyp, aıtyp berdi.
Qostanaıdyń týmasy 19 jastaǵy Ábdipatta Nurjigit Asanuly óz erkimen 17 mamyrda Jambyl oblysy Qordaı aýdany Otar qalashyǵyndaǵy 30212 áskerı bólimine qabyldanǵan. Sodan beri bir aı ótpeı sarbazǵa kishi serjant tıisip, 6 maýsym kúni aýrýhanaǵa túsken. Qazir jansaqtaý bóliminde.
Áskerge sap-saý ketken jalǵyz ulynyń aýrýhanaǵa túskenin anasy tek 9 maýsym kúni estigen.
“9 maýsym kúni saǵat 16:30 shamasynda habarlasyp, balamnyń Qordaıdyń ortalyq aýrýhanasyna aýyr jaǵdaımen jetkizilip, jansaqtaý bólimine túskenin aıtty. Balam qazir IBL apparatyna qosylǵan, es-tússiz jatyr. Alǵashynda áskerı emhanalaryna óz aıaǵymen kelgen. Sol kezde qabyldaǵan dárigerge kishi serjant Turlan Dastan urǵanyn aıtqan. Ishten urǵan soń, ishi aýyryp, dárigerlerine dári surap barǵan. Sosyn jaǵdaıy nasharlap ortalyq aýrýhanaǵa jóneltilgen”, - deıdi anasy.
Áskerı emhana Nurjigitke oń jaq ókpeniń joǵary jáne ortańǵy bóliktik pnevmonııasy degen dıagnoz qoıǵan. Jaǵdaıy jedel nasharlaýyna baılanysty jedel-járdem shaqyrylyp, Qordaı aýdandyq kópbeıindi aýrýhanasyna jóneltken. Alaıda, anasy bul dıagnozben kelispeıtinin aıtady.
19 jastaǵy Nurjigittiń anasy bul istiń jyly jabylyp qalmaýyn suraıdy. Qııanat jasaǵandardy zań aldynda jaýapqa tartýǵa nıetti.
“29 maýsym kúni ant qabyldaý kerek edi. 1 aı da bolǵan joq. Bul istiń jyly jabylyp qalmaýyn suraımyn. Aryz jazyldy. Osy istiń basty nazarda ustap, tergeý júrgizilýin talap etemin. Barmaq basty, kóz qysty bolyp qalmasyn ”, deıdi anasy.
Quqyq qorǵaý organdary Qylmystyqtyq kodekstiń 451 baby 1 bólimi boıynsha qylmystyq is qozǵalǵanyn aıtady. Qazir tergeý júrgizilýde.
