Áleýmettik jelide Májilis depýtaty Rýslan Berdenovtyń bıik ǵımaratqa shyǵyp jarııalaǵan vıdeosy qyzý talqylanǵan bolatyn. Osyǵan baılanysty Respublica partııasynyń tóraǵasy Aıdarbek Qojanazarov pikir bildirdi, dep habarlaıdy “Adyrna” tilshisi.
“Birinshiden, bul Respublica partııasynyń bastaǵan akııasy emes. Bul naqty depýtat Berdenovtyń óziniń jeke ýaqytynda, ıaǵnı estýim boıynsha áleýmettik maqsatta túrirgen vıdeobeınesi. Úlken áleýmettik joba qatysty osyndaı vıdeo jasaǵan. Shyny kerek bul menimen jáne basqa da partııa múshelerimen kelisilgen joq. Biraq meniń oıymsha depýtat ta adam ǵoı, óziniń bos ýaqytynda qandaı beıne túsirip, zańdy buzbasa boldy emes pe? Sonymen qatar, depýtattyń áreketi zań qabyldaý jumystaryna áser etpese, erkin elde ómir súrgennen keıin ár adamnyń óz quqyǵy bar. Óz basym áriptesimniń áreketin quptaımyn nemese quptamaımyn dep baǵa bere almaımyn. Ony depýtat Berdenov myrzadan suraýyńyz qajet”, – dedi ol.
Áriptesterdiń biri «Bul beınejazba «Respublica» partııasynyń bedeline áser etpeı me?» dep suraq qoıdy.
“Respublica partııasy tek depýtat Berdenov nemese Aıdarbek Qojanazarov emes. Bizge daýys bergender qanshama adam bar jáne bizde 8 teń tóraǵa bar. Sondyqtan partııaǵa bir adamnyń istegen jaqsylyǵy da, jamandyǵy da qatty áser etpeıdi dep oılaımyn. Sebebi, bizdiń ózimizdiń saılaýaldy baǵdarlamamyz ben kóterip jatqan suraqtarymyz bar. Meniń oıymsha, bizdiń bedelimizge tek jasap jatqan naqty jumysymyz áser etedi. Eger otyrystarda durys jumys istemeı, biraq ádemi bolyp syrtta júrsek osy keri áser etedi. Meniń oıymsha, biz depýtattyń áreketine qatty kóńil bólip jatqan sııaqtymyz. Bul jaı ǵana áleýmettik beınejazba. Mysaly sheneýnikterdiń aýyzynan halyqqa «kóp aqsha tabyńdar» degen sózder shyǵyp ketip jatady. Aıtalyq osy sóz Úkimettiń bedeline áser etetin shyǵar. Biraq tek vıdeojazbanyń bizdiń parııanyń abyroıyna daq keltiredi dep oılamaımyn”, – dedi depýtat.
Buǵan deıin áleýimettik jelide Rýslan Berdenovtyń elordadaǵy eń záýlim ǵımarat – Ábý-Dabı Plazanyń tóbesinde sýperqaharman shekpenimen shyqqany jarııalanǵan bolatyn. Depýtattyń ózi muny áleýmettik beınerolıktiń bir bóligi dep túsindirdi.
