Aqmola oblysynyń Býrabaı ákimi Sabyr Jalmuqanovqa ádep kodeksin buzǵany úshin qatań sógis jarııalandy. Aqmola oblysynyń prokýratýrasy ákim tarapynan zańbuzýshylyqty anyqtaǵan, dep habarlaıdy “Adyrna” ulttyq portaly.
“Býrabaı aýylynyń ákimi men JShS arasynda alańdy abattandyrý boıynsha memlekettik satyp alý týraly kelisim jasalǵan. Kelisimsharttyq mindettemelerdi oryndaý barysynda ákim kásipkerden smetalyq qujattamada qarastyrylmaǵan qosymsha jumystardy oryndaýdy talap etken. Óz kezeginde kásipker tapsyrys berýshige táýeldi jaǵdaıda bolǵandyqtan, bul jumystardyń bir bóligin oryndaýǵa májbúr bolǵan”, – delingen habarlamada.
Sondaı-aq, ákim óz is-áreketimen kásipkerlik sýbektisine 400 myń teńge materıaldyq shyǵyn keltirdi.
Býrabaı aýdan ákiminiń ókimimen Býrabaı aýylynyń ákimine "qatań sógis" túrindegi tártiptik jaza qoldanyldy.
