Kámeletke tolmaǵan qyzdy zorlaǵan er adamǵa qatysty úkim shyqty, dep habarlaıdy "Adyrna" ulttyq portaly.
Pavlodar oblysynyń qylmystyq ister jónindegi mamandandyrylǵan aýdanaralyq sotynda 51 jastaǵy er adamnyń isi qaraldy.
Ol 2023 jyldyń shilde aıynda kámeletke tolmaǵan qyz balany zorlaǵan. Tergeý málimetinshe, kámeletke tolmaǵan qyz Pavlodardaǵy dámhanalardyń birinde tájirıbeden ótken. Sol sátte dámhanada aspaz bolyp jumys isteıtin er adammen tanysqan.
Er adam men qyzben áleýmettik jeli arqyly sóılesip, artynsha qyzǵa birge turýǵa usynys jasaǵan. Qyz eresek adammen birge turý usynysyn qabyldapty. Ekeýi dastarhan jaıyp, ishimdik ishken. Artynsha jábirlenýshi uıyqtamaq bolǵanda, er adam ony zorlaǵan.
Qyzdyń zorlanǵanyn Qylmystyq ister jónindegi mamandandyrylǵan aýdanaralyq sotynyń sýdıasy rastady.
"Jábirlenýshiniń zorlanǵanyn dostary aıtyp, kómek suraǵanyn, uıaly telefonyndaǵy habarlamalaryn kóretken. Sottalýshynyń kinási jábirlenýshiniń, kýálardyń aıǵaqtarymen, sot saraptamasynyń qorytyndylarymen jáne sotta zerttelgen basqa da dáleldermen dáleldendi", – dep atap ótti Qylmystyq ister jónindegi mamandandyrylǵan aýdanaralyq sotynyń sýdıasy Qudabaı Sultanov.
Alaıda sot barysynda 51 jastaǵy er adam óz kinásin moıyndamady. Sottalýshynyń aıtýynsha, ol qyzdyń kámeletke tolmaǵanyn bilmegen.
51 jastaǵy er adam Qylmystyq kodekstiń 120-babynyń 3-1-bóliginde kózdelgen qylmysty jasaǵany úshin aıypty dep tanylyp, 15 jylǵa bas bostandyǵynan aıyrý jazasy taǵaıyndaldy.
