Qazaqstan men AQSh adam quqyqtary jónindegi kezdesýdi Vashıngtonda jalǵastyrýǵa kelisti, dep habarlaıdy "Adyrna" ulttyq portaly QR Syrtqy ister mınıstrliginiń baspasóz qyzmeti.
«Astana qalasynda Qazaqstan Respýblıkasy Prezıdentiniń Halyqaralyq máseleler jónindegi kómekshisi Erjan Qazyhan jáne AQSh Memlekettik hatshysynyń Azamattyq qaýipsizdik, demokratııa jáne adam quqyqtary máseleleri jónindegi orynbasary Ýzra Zeıanyń teń tóraǵalyǵymen QR men AQSh arasyndaǵy Adam quqyqtary men demokratııalyq reformalar jónindegi jyl saıynǵy joǵary deńgeıdegi dıalogtyń úshinshi otyrysy ótti», - delingen habarlamada.
Is-shara barysynda taraptar adam quqyqtary salasynda ózara qyzyǵýshylyq týdyratyn máseleler boıynsha Qazaqstan men AQSh arasyndaǵy yntymaqtastyqty syndarly túrde talqylady. Taraptar Prezıdent Qasym-Jomart Toqaevtyń saıası reformalar baǵdarlamasyn, sonyń ishinde múmkindigi shekteýli adamdardyń quqyqtaryn keńeıtý, adam saýdasyna qarsy is-qımyl, jınalystar bostandyǵyn, sóz bostandyǵyn qamtamasyz etý, BAQ-ty damytýdy qoldaý, sondaı-aq aktıvterdi qaıtarý jáne sybaılas jemqorlyqqa qarsy kúres máselelerin odan ári iske asyrýǵa nazar aýdardy.
"Amerıkalyq tarap ózara múddeler men ortaq qundylyqtarǵa negizdelgen tabysty jáne senimdi yntymaqtastyqqa berik ustanymdaryn bildirdi. Memlekettik hatshysynyń orynbasary Ýzra Zeıa QR Prezıdenti Qasym-Jomart Toqaevtyń saıası jáne áleýmettik-ekonomıkalyq reformalaryna AQSh tarapynyń turaqty qoldaýyn rastap, sondaı-aq ótken jeltoqsanda Qazaqstan Prezıdenti qol qoıǵan Adam quqyqtary men zań ústemdigi salasyndaǵy is-qımyl josparyn dáıekti júzege asyrýdyń mańyzdylyǵyn atap ótti" delingen habarlamada.
Áıelder men balalarǵa qatysty zorlyq-zombylyqqa nóldik tózimdilik saıasatyn kúsheıtýge erekshe nazar aýdaryldy. Atap aıtqanda, amerıkalyq tarap a.j. 15 sáýirde qabyldanǵan QR-da otbasylyq-turmystyq zorlyq-zombylyq pen balalarǵa qatysty zorlyq-zombylyq úshin jazany qatańdatatyn zańdy quptady.
Sonymen birge, taraptar kópjaqty jáne óńirlik platformalar deńgeıinde adam quqyqtaryn ilgeriletý máselelerin, sonyń ishinde BUU-nyń Adam quqyqtary jónindegi keńesi arqyly yntymaqtastyqty jáne Nıý-Iork q. ótken jylǵy «S5+1» Sammıtiniń qorytyndysy boıynsha bastamalardy júzege asyrý máselelerin talqylady.
Kezdesý nátıjesinde ózara is-qımyldy jalǵastyrýǵa jáne Dıalogtyń kelesi otyrysyn 2025 jyly Vashıngton qalasynda ótkizý týraly kelisimge qol jetkizildi.
