Premer-Mınıstri Oljas Bektenov Rıdderdegi jumystardy kúsheıtý úshin Úkimet rezervinen qosymsha qarajat bólý týraly qaýlyǵa qol qoıdy. Bul týraly úkimettiń baspasóz qyzmeti málimdedi, dep habarlaıdy “Adyrna” ulttyq portaly.
Memleket basshysy Qasym-Jomart Toqaevtyń tapsyrmasy boıynsha Úkimet elimizdiń jylýmen jabdyqtaý júıesin keshendi túrde jańǵyrtý jumystaryn júrgizip jatyr.
Málimet boıynsha, Rıdderdiń jylý jelilerine byltyr júrgizilgen jóndeý-qalpyna keltirý jumystary olardyń tozý deńgeıin 78,8%-ǵa deıin tómendetýge múmkindik berdi. Alaıda, bul turǵyndardy jylýmen úzdiksiz qamtamasyz etý úshin áli de jetkiliksiz. Jalpy alǵanda, ótken jylytý maýsymynda jylý jelilerinde 25 tehnologııalyq buzýshylyq faktisi tirkeldi, sonyń saldarynan tutynýshylar úshin shekteýler engizildi.
Keıinge qaldyrýǵa bolmaıtyn qajetti shuǵyl jumystardy eskere otyryp, QR Úkimeti rezervinen Rıdder qalasynyń "Vodokanal" jylý jelilerin kúrdeli jóndeýge 2,4 mlrd teńgeden astam qarajat bóldi. Bul olardyń tozý deńgeıin jaramdy kórsetkishterge deıin jetkizýge jáne qysqy kezeńge daıyndyǵyn qamtamasyz etýge múmkindik beredi. 50-den astam ýchaskede jumystar júrgizilmek.
Eske sala keteıik, bir aıdan az ýaqyt buryn Bektenov Kentaý, Rıdder jáne Qyzylorda qalalarynyń jylý kózderin rekonstrýkııalaýǵa qarajat bólý týraly qaýlylarǵa qol qoıǵan bolatyn. Atap aıtqanda, Rıdder jylý elektr ortalyǵynyń tehnologııalyq jabdyqtary men ınfraqurylymyna kúrdeli jóndeý jumystaryn júrgizýge 4,9 mlrd teńge bólindi.
Jalpy alǵanda, jylýmen jabdyqtaý júıesin jańǵyrtý jumystary aıasynda Astana, Almaty, Shymkent, Atyraý, Óskemen, Qaraǵandy, Aqtaý, Taraz, Petropavl, Pavlodar, Jezqazǵan, Aqtóbe, Ekibastuz, Stepnogorsk, Rýdnyı, Balqash jáne Aqsý qalalarynda 10 energııa blogyn, 55 qazandyqty jáne 45 týrbınany jóndeý josparlanyp otyr.
Respýblıkanyń jylý kózderi men jylý jelilerin keshendi túrde jańǵyrtý máselesi úkimettiń turaqty baqylaýynda.
