Aqtóbedegi turǵyn úı kesheni men qurylys kompanııasynyń atyna shaǵym tústi, dep habarlaıdy "Adyrna" ulttyq portaly.
Aqtóbede "Qazyna Premıým" turǵyn úı kesheniniń turǵyndary páter kiltin ala almaı júr. Sebebi 2022 jyly qurylysy aıaqtalý kerek bolǵan páterdiń qabyrǵasy qalanyp, jumys toqtaǵan.
Aótóbe qalasy Batys 2 shaǵyn aýdanynda bastalǵan qurylysqa jaýapty mekeme - "Jastar Qurylys" JShS. Nysan tólqujatynda úıdiń qurylysy 2021 jyldyń sáýir aıynda bastalǵany jazylǵan. Jospar boıynsha ǵımarat 2022 jyldyń jeltoqsan aıynda bitýi kerek edi. Alaıda baspanaly bolýǵa úmitti azamattar daıyn páterden emes, tek tórt qabyrǵasy qalanyp, qurylysy bitpegen alańnnan sóılep tur. Ashynǵan halyq Prezıdent, Premer-mınıstr, Májilis tóraǵasynan kómek surap, beıne úndeý jazdy.
"Meniń úndeýimniń sebebi "Qazyna Premıým" turǵyn úı kesheni, "Jastar Qurylys" JShS basshysy Tórehanova Sáýle Jarylqaǵanqyzy 2021 jyly bizden qarajatymyzdy jınap alyp, "úı salyp beremiz" degen. Úıdiń bitý merzimi 2022 jyldyń sońǵy toqsany degen bolatyn. Sodan beri osy 105 páterli turǵyn úı kesheninde halyqtan jınalǵan qarajattyń kólemi 1,5 mlrd teńge. Qazir 2024 jyl boldy. Degenmen úıdiń bitetin túri joq. Biz oblys ákimdigine, qala ákimdigine, oblystyń qurylys basqarmasyna, jergilikti quzyrly organdarǵa aryz-shaǵym túsirdik. Bizdiń aryz-shaǵym aıaq-asty negizsiz, esh qaraýsyz qalyp ketýde. Oǵan jaýap ta berilmeıdi. Buǵan ne sebep ekenin bilmeımiz!" - deıdi aqtóbelik Marat Ahmetov.
Azamattardyń sózinshe, qurylysty aıaqtap, "páter beremin" degen azamatshanyń qalada birneshe bıznesi bar. Baspanaly bolamyz degen jurttyń basty armany - ǵımarattyń qurylysy jyldam jalǵasyp, daıyn páterge tezirek kirý.
"Men sekildi sońǵy qarajatyn salyp, bala-shaǵasymen páter jaǵalap, aılyǵyn páterge berip, turmys keship otyrǵandar jeterlik. Sáýle hanym úıdi bitirip beremin dese onyń tolyq múmkindigi bar. Ol 1,5 mlrd qarajatqa qalanyń ortalyǵynan dál osyndaı turǵyn úı keshenin salyp beremin dep 300 mln teńgege jer satyp alǵany belgili. Onyń atynda "Almas" saýda úıi bar. Odan bólek, qaladaǵy 12 móltek aýdanynda halyqqa qyzmet kórsetip otyrǵan meıramhanasy bar. Osylardy satsa da halyqtyń jan-aıqaıyn tyńdap, úıdi bitirip berer múmkindigi bar. Ony istemeı otyr", - deıdi úndeý jasaǵan azamat.
Aqtóbelikter "páter beremin" dep san soqtyratyn alaıaqtarǵa qarsy qurylys salasyna qatysty zańǵa tolyqtyrýlar men ózgertýler engizýdi suraıdy. Olardyń sózinshe atalǵan turǵyn úı keshiniń basshysyna 105 adam aqsha berip, baspanaǵa qol jetkize almaı júr.
