Búgin Astana sotynda áıelin óltirdi dep aıyptalǵan eks-mınıstr Qýandyq Bıshimbaev pen onyń týysy Baqytjan Baıjanovqa qatysty sot proesi jalǵasyp jatyr. Sot barysynda alqabılerge qoıylǵan suraqtar belgili boldy, dep habarlaıdy “Adyrna” ulttyq portaly.
Iske tóraǵalyq etetin sýdıa Aıjan Qulbaeva 13 mamyrdaǵy sot otyrysynda úkim shyǵarý barysynda alqabıler keńesý bólmesinde jaýap berýi kerek suraqtardy oqydy. Onyń ishinde, Bıshimbaevqa qatysty QK 110-baby boıynsha qoıylǵan suraqtar:
- 2022 jyldyń 16 jeltoqsanynan 2023 jyldyń 9 qarashasyna deıin, 2022 jyldyń naýryz, sáýir, qazanynda, sondaı-aq 2023 jyldyń jazynda Astana jáne Almaty qalalarynda jábirlenýshi Núkenovaǵa denesiniń túrli bóligin jáne basynan urý arqyly fızıkalyq qysym jasalǵany, ar-namysyna tııý arqyly moraldyq qysym jasalǵany dáleldendi me?
- Bul áreketti sottalýshy Bıshimbaevtyń jasaǵany dáleldendi me?
- Sottalýshy Bıshimbaev bul áreketti jasaǵanyna kináli me?
- Jábirlenýshi Núkenovanyń sottalýshy Bıshimbaevpen birge tura bastaǵan ýaqyttan bastap óz betinshe aqsha tabýdy doǵaryp, oǵan materıaldyq turǵyda táýeldi boldy ma?
Qylmystyq kodekstiń 99-baby boıynsha qoıylatyn suraqtar reti:
- 2023 jyldyń 9 qarashasynda shamamen tústen keıin Astanadaǵy Bau meıramhanasynda jábirlenýshi Núkenova bas-mı jaraqaty saldarynan qaıtys bolǵany dáleldendi me?
- Bul jaraqat jábirlenýshi Núkenovaǵa basyna birneshe soqqyny sanaly túrde jasaý arqyly maqsatty túrde óltirgeni dáleldendi me?
- Bul áreketti sottalýshy Bıshimbaevtyń jasaǵany dáleldendi me?
- Sottalýshy Bıshimbaev bul áreketti jasaǵanyna kináli me?
- Sottalýshy Bıshimbaevtyń jábirlenýshi Núkenovany uryp-soǵyp, oǵan sý men uıqy bermeı qorlap, aıasýsyz fızıkalyq qysym jasaý arqyly óltirgeni dáleldendi me?
- Núkenova basynan alǵan jaraqat sanaly túrde jasalǵany, onyń densaýlyǵyna asa aýyr zııan keltirgeni, sonyń saldarynan qaıtys bolǵany dáleldendi me? Sottalýshy Bıshimbaevtyń bul áreketti jasaǵany dáleldendi me jáne sottalýshy Bıshimbaev bul áreketti jasaǵany úshin kináli me?
Aıta keteıik, sýdıa Aıjan Qulbaeva sheshim shyǵarý úshin 10 negizgi alqabımen birge keńesý bólmesine ketti.
Eske salsaq, Qýandyq Bıshimbaevqa qylmystyq kodekstiń 99-baby jáne 110-baby boıynsha aıyp taǵylǵan.
Al Baqytjan Baıjanov qylmystyq kodekstiń 432-baby boıynsha aıyptalyp otyr.
