QR Mádenıet jáne aqparat mınıstri Aıda Balaeva Qazaqstan halqyn Jeńis kúnimen quttyqtady, dep habarlaıdy “Adyrna” ulttyq portaly.
«Barshańyzdy elimiz halqy jáne álem jurty úshin mańyzdy mereke – Jeńis kúnimen quttyqtaımyn. Bul kúni biz bolashaǵymyz úshin, beıbitshilik pen turaqtylyq jolynda janyn qıǵan erlerdi eske alamyz. Jeńis kúni qarsańynda Prezıdentimiz Qasym-Jomart Kemeluly «Otan ana» eskertkishine gúl shoqtaryn qoıyp, ekinshi jahan soǵysynda qaza tapqan qazaq jaýyngerlerin bir mınýt únsizdikpen eske aldy», – dedi Aıda Balaeva óz paraqshasynda jazǵan quttyqtaýynda.
Ol Memleket basshysynyń quttyqtaýyn eske túsirdi.
«El halqyn jeńis kúnimen quttyqtaǵan Memleket basshysy beıbitshilikti saqtaý men nyǵaıtýdyń mańyzdylyǵyn eske saldy... Jeńis kúnine oraı barlyq óńirde adamzat tarıhyndaǵy eń qandy soǵysta qaza tapqan jaýyngerlerdiń eskertkishterine gúl shoqtaryn qoıý rásimi ótýde... Keler jyly biz Uly Jeńistiń 80 jyldyǵyn toılaımyz. Memleket basshysynyń keń kólemde atap ótýge daıyndyq jónindegi tapsyrmasyn oryndaý sheńberinde, soǵys jyldarynda teńdessiz erlik kórsetken jerlesterimizdi este qaldyrý, ekinshi jahan soǵysyndaǵy oqıǵalarǵa qatysty zertteýler jáne muraǵat materıaldaryn zerdeleý jumystary kúsheıtiledi. Sondaı-aq respýblıka boıynsha eldi mekenderdiń, nysandardyń, kóshelerdiń ataýlarynda soǵys qaharmandaryn máńgi qaldyrý tájirıbesi jalǵaspaq», – dep jazdy mınıstr.
Jeńis kúni – batyrlarymyzdyń erlikterin eske alatyn kún.
«Beıbitshilik pen yntymaqty qasterleý, erkindik pen táýelsizdikti baǵalaý kerektigin eske salady. Elimizde beıbitshilik pen kelisimdi saqtaý úshin árqaısymyz qoldan kelgenniń bárin jasap kelemiz. Qaza tapqan qaharmandardyń esimi máńgi jadymyzda jańǵyryp, erlikteri urpaqtan-urpaqqa jete bereri sózsiz», – dedi Aıda Balaeva.
