Qaraǵandylyqtar "Taza Qazaqstan" respýblıkalyq ekoakııasyna belsendi qatysyp jatyr. Ótken senbilikterde olar 5 myń tonnadan astam qoqys jınady. Mereke kúni, 7 mamyrda 100-den astam adam Buqpa ózeniniń aýmaǵyn tazartýǵa kiristi.
Qatysýshylar qatarynda ekologııalyq qozǵalystyń eriktileri, qala jastary jáne jergilikti atqarýshy organdardyń ókilderi bar.
Olar birlesip ózen arnasynyń bir bóligin tazalap, 300 qap qoqys jınady.
– Búgin Buqpa ózenin tazartý boıynsha úlken jumys atqaryldy, bolashaqta biz ony jalǵastyramyz. Sondaı-aq, bir aı boıy jalǵasatyn "Taza Qazaqstan" akııasy barysynda 5000 tonnadan astam qoqys jınalǵanyn atap ótkim keledi. Senbilikke qalanyń 10 myńǵa jýyq turǵyny qatysty, – dedi Qazybek bı atyndaǵy aýdan ákiminiń orynbasary Rınat Qarjasbaev.
Ekologııalyq eriktiler qozǵalysynyń jetekshisi Rahat Raıymbekov qaraǵandylyqtardy sý resýrstaryna uqypty qaraýǵa, ózender men sý aıdyndaryn lastamaýǵa shaqyrdy.
– Taza sý – bizdiń ortaq baılyǵymyz, ony qorǵaý qajet, – deıdi Rahat Raıymbekov. – Ózender men kólderdi taza ustaı otyryp, biz adamdardyń densaýlyǵy men ál-aýqatyna qamqorlyq jasaımyz. Bizdiń árqaısymyz qalany osyndaı akııalarǵa qatysý arqyly qoqyssyz jáne taza ete alamyz. Qaraǵandy úshin taza tirshilik nári – "Móldir bulaq" quraıyq!
Esterińizge sala keteıik, "Taza Qazaqstan" ekoakııasynyń besinshi aptasy "Móldir bulaq" dep atalyp, bulaqtardy, ózender men kólderdiń jaǵalaý aımaqtaryn tazartýǵa arnalǵan.
