Atyraý oblysy Qulsary qalasynda sý tasqynynan zardap shekken turǵyndar ortalyq alańǵa jınaldy. Olar bılikten baspana shyǵynyn ótep, bir sharshy metr úshin 400 myń teńge tóleýdi talap etip otyr, dep habarlaıdy «Adyrna» tilshisi «Aq Jaıyq» basylymyna silteme jasap.
Ondaǵan qulsarylyq talaptary oryndalmaıynsha alańnan ketpeıtinin málimdedi. Jınalǵandardyń biri, úsh balanyń anasy Jazıra Qulmuhanova týystarymen birge turýdan sharshaǵanyn aıtty. Ol óz máselesin shuǵyl túrde sheshýdi talap etti.
«Úkimet sýǵa ketken úıdiń alańynyń ár sharshy metrin 400 myń teńgeden eseptese, qalaǵan jerden úı satyp alar edik»,—dedi ol.
Al Tolqyn Qojahmetova bir rettik 369 myń teńge kólemindegi materıaldyq kómek esebinen saraı jaldap otyrǵanyn málimdedi.
«Jasymyz 60-qa kelgende bireýdiń saraıynda otyrmyz. Tym jaqsy, úp-úlken úıimiz boldy. Uldy uıaǵa, qyzdy qııaǵa qondyrdyq, endi rahat ómir súrdik pe degende, mine, mynadaı jaǵdaı bolyp otyr. Bizdi dalaǵa qýyp shyqty. Aqshamyzdy bersin. Esepshotymyzǵa aýdarsyn. Úıdi ózimiz salamyz»,—dedi Qojahmetova.
Alańǵa jınalǵandarmen Jylyoı aýdanynyń ákimi Jumabek Qarajanov pen orynbasarlary Gúlnafız Aıshýaqova men Nurbolat Sarmanov kezdesti. Ákim barlyq turǵyn úı shyǵynynyń tólenetinin aıtty. Alaıda turǵyndar qur ýádeden sharshaǵandaryn jetkizdi.
«Ákim zardap shekken nysandardy baǵalaý nátıjesi 15 mamyrdan keıin shyǵady dep ýáde berdi. Alaıda buǵan deıin ol 2 mamyrda jarııalanady delingen. Biz ári qaraı kúte almaımyz!»—dedi halyq.
