202 otbasy sý tasqynynan qıraǵan baspanasynyń ornyna turǵyn úı men páter aldy. Bul týraly QR Premer-mınıstriniń resmı aqparattyq resýrsy jarııalady, dep habarlaıdy “Adyrna” ulttyq portaly.
Qazaqstan Úkimeti Memleket basshysy Qasym-Jomart Toqaevtyń tapsyrmasy boıynsha bıylǵy kóktemde oryn alǵan aýqymdy sý tasqynynan zardap shekken azamattarǵa keltirilgen shyǵyndy óteý jumystaryn jalǵastyrýda.
Aqparatqa sáıkes, búgingi tańda 24 641 otbasy 9,3 mlrd teńgeden astam somaǵa 100 AEK mólsherinde birjolǵy tólem aldy. Mal shyǵyny úshin berilgen memlekettik kómek kólemi 1,3 mlrd teńgeden asty.
17 mamyrdaǵy jaǵdaı boıynsha búginde 202 otbasy qıraǵan baspanasynyń ornyna turǵyn úı men páterge ıe boldy. Aqtóbe, Batys Qazaqstan, Soltústik Qazaqstan jáne Pavlodar oblystarynda zardap shekken azamattarǵa arnalǵan 658 jańa úı salynyp jatyr.
Sonymen qatar 596 otbasyna 878 mln teńgeden astam somaǵa turǵyn úıdi jóndeýge jáne qalpyna keltirýge ótemaqy tólendi. Zardap shekken óńirlerde barlyǵy 10 740 turǵyn úı tekserilip, 8 168 nysan boıynsha baǵalaý júrgizildi.
Keltirilgen zııandy óteý jumystary jalǵasýda jáne Úkimettiń qatań baqylaýynda. QR Prezıdentiniń tapsyrmasy boıynsha zardap shekken azamattardyń barlyǵyna jan-jaqty kómek pen qoldaý kórsetiledi.
