Maıqaıyń-Altyn ken ornynda joǵalyp ketken eki qyzmetkerdiń otbasyna búginge deıin jalaqy tólenip otyr, dep habarlaıdy "Adyrna" tilshisi Orda.kz-ke siltep.
Alaıda otbasy olarǵa aqsha emes, marqumdardyń múrdesin taýyp berýdi suraıdy.
Joǵalǵan 36 jastaǵy qutqarýshy Aıdos Shaımerdenniń artynda ata-anasy, áıeli men bes balasy qalǵan.
Joǵalyp ketken azamattyń ákesi qaıǵyly oqıǵadan keıin eki ret ınsýlt alǵan. Marqumdy joqtap Astanaǵa onyń otbasy men týystary kelgen.
Aıdos Shaımerdenniń jeti jasar uly Ersultan da Astanaǵa kelgen. Balanyń aıtýynsha ol ákesiniń astanany kórsetýge ýáde bergenin esine túsirdi. Jarynan aıyrylǵan Nusrulý Shaımerden:
«Kúnimiz ben túnimiz jylaýmen ótedi. Qart ákesi ınsýlt alǵan, al anasynyń qan qysymy kóterilgen. Jalǵyz uly joq. Ony durystap jerleı de almadyq qoı», – dep jylaıdy.
4 qańtar kúni avtobýs apatynan eki adamnyń denesi tabyldy. Alaıda qutqarýshy Aıdos Shaımerden men qutqarý jasaǵynyń júrgizýshisi Aıyp Tileýbergenov múrdeleri áli tabylmaǵan.
Ókinishke oraı, jerdiń opyrylyp qalý qaýpine baılanysty marqumdardyń denesin izdeý jumystary toqtatylǵan.
Izdestirý jumystaryn jalǵastyrý úshin Aıdos Shaımerdenniń týystary oblystyq prokýratýraǵa habar bergen. Alaıda ol jaqtaǵylar sotqa aryz jazýǵa nemese odan ári taý-ken jumystarynyń qaýipsizdigin qamtamasyz etý sharalary qabyldanǵansha kútýge keńes bergen kórinedi.
