Sońǵy kezderi elimizde dinı jamaǵatqa bólinýshilik úderisi beleń alǵany baıqalady. Buǵan áleýmettik qubylys retinde qaraýǵa bolar, alaıda onyń ishinde alasy da, qulasy da bolatyny zańdylyq. Ásirese, ózge pıǵyldaǵy dinı jamaǵattardan qoǵamǵa qaýip kóbirek. Búgingi talqy taqyrybymyzda destrýktıvti dinı jamaǵattardyń kózdegeni men kóksegeni ne ekenin ashyp aıtamyz.
Destrýktıvti dinı jamaǵattar barlyq kezeńde kózdegenine jetý úshin eshteńeden taıynbaǵan. Dindi qalaýlarynsha burmalap, ártúrli aıla-sharǵyǵa baryp otyrǵan. Qoǵamǵa iritki salýdyń jolyn izdep, zulymdyqty aqtaýǵa tyrysqan. Búgingi tańda olardan tónetin qater kúsheımese, seıilgen joq. Artynan erýshilerdiń qatary kóbeımese, kemigen joq.
Jalpy destrýktıvti dinı jamaǵattar adamdar arasyndaǵy týystyq, otbasylyq, baýyrlastyq qatynastardy joqqa shyǵarady. Ózara ymyraǵa kelýge múlde talpynbaıdy. Olarǵa ózgeni adasqan deý – áldeqaıda ońaı. Destrýktıvti jamaǵattar árdaıym qataryn toltyryp otyrýǵa talpynady. Ol jolda adamdardy aldap, arbap, ózderin bilim berý, bıznes, mádenıet salasynyń ókilderi retinde kórsetýge tyrysady.
Teris pıǵyldylar eń aldymen óz jemtigin tańdap, onymen jaqynyraq tanysýdyń jolyn izdeıdi. Ózderin adal, jaqsy adamdardaı kórsetedi. Adamnyń dinge degen qyzyǵýshylyn oıatýǵa, ol úshin kómek kórsetip, janynan tabylýǵa daıyn ekenin jetkizedi. Osylaısha, jalǵan dostyq baılanys bastalady. Al arbalýshy olardyń shekten tys janashyrlyǵyna senim bildire bastaıdy. Onyń júris turysy árdaıym qadaǵalanyp, óz jaqyndaryna jat bolǵansha áreket osylaı jalǵasady. Kez kelgen máselede solarǵa júginetin hálge jetedi. Qoǵamǵa degen jıirkenish sezimin oıatyp, adamdardy adasýshylar retinde kórsetip baǵady. Osyndaı psıhologııalyq etaptardan ótken arbalýshy óz ómirin sol jamaǵattyń múddesine arnaýǵa daıyn turady. Ózim degendi múlde umytady.
Mine, sondyqtan teris pıǵyldylardyń qoǵam úshin keltirer zalalyn aıtpasa da túsinikti. Bul óz kezeginde ulttyq qundylyǵymzǵada keri áserin tıgizýde.
Sol úshin elimizdegi kúmándi jáne destrýktıvti sıpattaǵy «jamaǵattardyń» kóbeıýine saqtyqpen qaraǵanymyz abzal. Áıtpese, búırekten sıraq shyǵarýǵa ázir turǵandardyń joqtyǵyna kim kepil?! Jat jamaǵattardan saqtaýdyń emes, saqtanýdyń jolyn izdegenimiz jón shyǵar...
Dinge qatysty suraq bolǵan jaǵdaıda tek resmı din ókilderi men bilikti teologtarǵa júgingen durys jáne qaýipsiz bolar.
