Qazaqstannyń soltústigindegi Qyzyljar qalasyn Reseıge qosý týraly másele kóterip, memlekettik shekaranyń tutastyǵyn buzýǵa árekettengen, separatıst Valerıı Lıhýshın qylmystyq jaýapkershilikten bosatyldy, - dep habarlaıdy "Adyrna" ulttyq portaly pkzsk.info saıtyna silteme jasap. Ótken jyly Petropavl qalalyq soty Facebook áleýmettik jelisinde «Pıotr Sıdorov» degen laqap atpen tirkelip alyp, qazaqtyń tilin, qazaq halqyn qorlap jáne Petropavl qalasyn Reseıge qosý týraly bastama kóterip júrgen Valerıı Lıhýshındi 8 jylǵa bas bostandyǵynan aıyrǵan bolatyn.
Valerıı Lıhýshınniń advokatynyń aıtýynsha, ol oqýshy kezinde "psıhıkasynda aýytqýy bar" degen dıagnozben psıhonevrologııalyq dıspanserde esepte turǵan. Júıke aýyrýy bar balalarǵa arnalǵan arnaıy mektepti bitirgen. Biraq keıinen Lıhýshın saýyqqany sebepti esepten shyǵarylǵan. Sot kezinde ol óziniń basyn uryp, áldebir daýystardyń tapsyrýymen áreket etkenin aıtyp shaǵymdandy. Sottalýshynyń osy áreketinen keıin sot oǵan psıhologııalyq-psıhıatrııalyq saraptama taǵaıyndaýǵa sheshim qabyldaǵan. Saraptama nátıjesi Valerıı Lıhýshınniń aqyl-esi aýysqanyn kórsetken.
Petropavl qalalyq soty 4 tamyz kúni saraptama qorytyndysyna súıenip, separatıstiń burynǵy shyǵarylǵan úkimniń kúshin joıdy. Sýdıa Lıhýshınniń "aqyl-esiniń aýysqany dáleldendi" dep taýyp, qylmystyq jaýapkershilikten bosatyp, ony májbúrli túrde psıhıkalyq aýytqý bar azamattardy emdeıtin aýrýhanaǵa aýystyrýǵa sheshim shyǵardy.
Sot otyrysyna Lıhýshınniń ózi qatyspaǵan. Onyń zańdy ókili qorǵaýyndaǵy Valerıı Lıhýshınniń qylmysy dáleldenbegeni sebepti óndiristegi isti qysqartýdy suraǵan.
"Aqyl-esiniń aqaýy bar" azamattyń feısbýk áleýmettik jelisinde Petr Sıdorov paraqshasyn qoldanatyny anyqtaldy. Ol paraqshasynda udaıy túrde ultaralyq dúrdarazdyqty qozdyrýǵa umtylatyny baıqalady.
Eske sala keteıik, Qyzyljar óńirinde sońǵy 2,5 jyl ishinde "separatıstik áreket jasady", "ultarazdyǵyn qozdyrdy" degen aıyppen 11 azamat sottalǵan. Olardyń ishinde aıypty dep tanylyp, birneshe jylǵa sottalǵandary da, shartty jazamen bostandyqqa shyqqandary da bar. Sol 11 istiń ishinde eń shýlysy Vıacheslav Zýdermannyń áreketi boldy. Avto jóndeýshi bolyp jumys isteıtin Vıacheslav Zýderman bastaǵan top (19 adam) 2023 jyldyń 19 naýryzynda "Eńbekshi halyqtyń keńesi" degen uıymnyń atynan málimdeme jasady. Sol málimdemede olar Qazaqstan memleketiniń quqyqtyq negizine kúmán keltirip, ózderiniń "táýelsizdigin jarııalady". Jıynda uıymǵa tóraǵa saılap, "deklaraııa", "jarǵy", "eltańba men mór" jobasyn bekitti. 18 sáýir kúni jıyn ótkizgenderdiń arasyndaǵy belsendi azamattar qamaldy, olardyń isi áli tergelip jatyr.
Sonymen qatar, Qyzyljarda seperatızm babymen tek slavıan tektes ulttardyń ókilderi ǵana emes, qazaqtar da isti bolǵan. Máselen, Asylbek Sekeýov atty azamat "slavıandyq ult ókilderin qorlady" degen aıyppen shartty jazamen 4 jylǵa sottalǵan.
Adyrna.kz
