Syr óńirinde Qazaqstan Ulttyq ǵylym akademııasynyń akademıgi, matematık, professor Asqar Jumadildaev atyndaǵy jas matematıkter arasyndaǵy halyqaralyq baıqaý bastaldy. Bilimdiler dodasyna elimizdiń jáne kórshiles Reseı, Qyrǵyzstan, Ózbekstan memleketinen kelgen 20 men 27 jas aralyǵyndaǵy 100 matematık baq synamaqshy. Búgin Óńirlik kommýnıkaııalar qyzmetiniń aqparat alańynda belgili matematık Asqar Jumadildaev BAQ ókilderine atalmysh baıqaýdyń negizgi talaptaryn túsindirip ótti.
- Halyqaralyq baıqaýdyń maqsaty – jas matematık muǵalimderdiń kásibı sheberligi men bilim alýshylardyń qabiletin damytýǵa baǵyttalady. Bul bilimdiler baıqaýy 2014-2018 jyldar aralyǵynda Qyzylorda qalasynyń jas matematıkteri arasynda ótikizilip kelgen. Al 2019 jyly bul baıqaý tuńǵysh ret halyqaralyq deńgeıde uıymdastyryldy. Bıyl oblys ákimi Nurlybek Mashbekuly Nálibaevtiń qoldaýymen baıqaýǵa qatysýshylar sany artyp, saıys joǵary deńgeıde uıymdastyryldy. Jalpy bizdiń Syr eli tek qasıetti ónerdiń ǵana emes bilimdilerdiń de ortasy. Bizdiń óńirde talaıdy tańdaı qaqtyrǵan myqtylar shyqqan. Solardyń izin jalǵastyrý úshin bizdiń jastar bilim men ǵylymǵa bet burýy kerek. Búgin bastaý alatyn halyqaralyq olımpıada naǵyz metematıkterdi anyqtaýǵa jáne jas ǵalymdardyń atyn shyǵarýǵa úlken múmkindik bolmaq. Bilimdiler dodasynda 7 kúrdeli esep bolady. Berilgen esepter tek bizdiń ǵana baıqaýǵa arnaıy daıyndalǵan. Sondaı-aq, bıylǵy baıqaýdyń bir erekshiligi – qatysýshylarǵa ózim oılastyrǵan bir esepti qoıatyn bolamyn. Qatysýshy jastarǵa sáttilik tileımin!, - dedi Asqar Serqululy.
Brıfıng barysynda fızıka matematıka ǵylymdarynyń doktory, Qazaqstan Matematıka páni muǵalimder qaýymdastyǵynyń Prezıdenti, Halyqaralyq Jáýtikov olımpıadasynyń negizin qalaýshy Qaırosh Maqyshov halyqaralyq baıqaý týraly óz pikirin jetkizdi.
- Ózderińiz biletindeı, jalpy jaratylystaný baǵyty óte kúrdeli bolyp keledi. Onyń ishinde matematıka baǵytyn kez kelgen bilim alýshy tereń meńgerip, kúrdeli esepterdi shyǵara almaıdy. Matematıkany jaqsy meńgerý úshin ushqyr oılap, logıkalyq qabiletti damytý kerek. Sondyqtan búgin bastalǵaly otyrǵan halyqaralyq baıqaýǵa elimiz ben kórshiles memleketterde óz bilimimen kózge túsken jastar qatysaıyn dep otyr, - dedi Qaırosh Bekseıituly.
- Ekinshi márte uıymdastyrylǵan halyqaralyq baıqaý mektep oqýshylaryn matematıkalyq suraqtarǵa daıyndaýǵa jáne bilim deńgeıin arttyrýǵa, jastardyń arasyndaǵy ózara dostyq qarym-qatynasty qalyptastyrýǵa óz septigin tıgizedi dep oılaımyn. 2022 jyly aımaq basshysy belsendi jastarmen kezdesý barysynda atalmysh saıysty oblystyq deńgeıde jáne halyqaralyq sıpatta ótkizý týraly sheshim qabyldady. Baıqaýdyń ótkizilýine qoldaý bildirgen Asqar Jumadildaev pen «Qazaqstan Matematıka páni muǵalimderi qaýymdastyǵynyń» ujymyna alǵys aıtamyz, - dedi oblystyq qoǵamdyq damý basqarmasynyń basshysy Almasbek Esmahanov.
Baıqaýdyń jalpy júlde qory – 3 mln.600 myń teńge. 1 orynǵa – 1mln,teńge, 2 orynǵa – 500 myń teńge, (2 jeńimpazǵa), 3 oryn – 300 myń teńge (2 jeńimpazǵa), Sondaı-aq, belsendilik tanytqan 10 qatysýshyǵa 100 myń teńgeden yntalandyrý syılyǵy tabystalatyn bolady.
Óńirlik kommýnıkaııalar qyzmeti
"Adyrna" ulttyq portaly
